Búkil memleket qazir betimen jaıylyp ketti. Keshikpeı talan-taraj,qyrǵynǵa aınalatyn túri bar. Alalyq, altyaýyzdyq, bireýge bireý senbeý kúsheıdi, ár adam, ár halyq óz qamyn oılap, ózin-ózi qorǵaıtyn kún týdy.
Bul bolyp jatqan oqıǵalardyń túbi nege soǵatynyn jalpy qazaq eli seze qoımaıtyn shyǵar. Oqıǵalardyń súreńi jaman: qam qylmaı, qol qýsyryp otyra bersek, aldymen qazaq halqy sorlaıtyn túri bar. Sonyń úshin biz janymyzdy, malymyzdy qorǵaý jaıyn oılaý kerek.
Ózimizdi ózimiz qorǵaý úshin bizge jalpy qazaq mılısıasyn qurý kerek.Bul másele shuǵyl asa zor bolǵandyqtan, tómende qol qoıýshylar halyqqa senimdi,qurmetti aqsaqaldardy hám oqyǵandardy shaqyryp, óz kúshimizben qazaq mılıtsıasyn qurý jaıyn keńesýge Jalpy qazaq sıezin jınaýǵa qaýly qyldyq.
Eger biz ózimizdi ózimiz qorǵaı almasaq, búlinshilik zoraıyp, qıynshylyqqa aınalǵanda qazaq halqy qurban bolady. Sonyń úshin mılıtsıa qurýdyń ústine sıezde qazaq halqynyń jurttyǵyn joǵaltpaý úshin ne qylý kerek degen zor másele de qaralady.
Alash balasynyń basyna bir syn, bir kún týdy. Ótinemiz, qalaı da bolsa, 5-inshi dekábirge qarsy Orynborǵa ár oıazdan jurtqa qadirli eki aqsaqaldan hám bir oblosnoı komıtetten eki oqyǵan kisiden jiberińizder.
Besinshi dekábirde Orynborda búkil qazaq-orys áskerleriniń sıezi de bolady. Bizge olarmenen de sóılesý kerek.
Bul telegramda aıtylǵan oıaz basy eki aqsaqal hám oblosnoı komıtetten shaqyrǵan eki zıalylardyń ústine aıryqsha telegram berip mynaý kisiler de shaqyryldy:
"Uran", "Saryarqa", "Birlik týy", "Tirshilik" gazetalarynan hám jańa ashylǵan qaýymdardan bir-bir ókilden.
Qazı Ǵumar Qarashuly, qazı Qaıyrshah Ahmetjanuly, qazı Qabıdolla Ishmuhameduly, Ahmed ıshan Orazaıuly, Qoja Ahmed Orazaı uly, Qorǵambek Birimjanuly, Jalmuhamed Janqojauly, Shahkerim Qudaıberdiuly, Iýsufbek Basyǵarauly, Mustafa Shoqaıuly, Halel Dosmuhameduly, Ýálıhan Tanashuly, Baqytkereı Qulmanuly, Janǵoja Mergenuly, Ishanǵalı Arabaıuly, Oraz Táttiuly, Shonan aqsaqal, Ónerbaı qajy Qondybaıuly, Ahmetkereı Qosýaquly, Nurlan Qıashuly, Turmuhamed Saǵynaıuly, Sháńgereı Bókeıuly, Esengul qajy Mamanuly, Muhamedjan Tynyshbaıuly, Salyq Qarpyquly, Naýryzbaı uly hám İlıas qajy...
Shaqyrý komısıalary: Ǵalı han Bókeıhan,
Ahmet Baıtursynuly,
Mırágqub Dýlatuly,
Saǵyndyq Dosjanuly,
Eldes Omaruly.
«Qazaq» gazeti,№250, 1917 jyl. Orynbor
Derekkóz: Bókeıhan Á. Shyǵarmalary. X tom.-Astana, 2018
Alash.kz ulttyq portaly
