Tobyl arnasynan asaıyn dep tur. Sý qoımasynan sýdyń tasýyna baılanysty Tobyl ózeni arnasynan asyp, Qostanaı qalasynyń shetki aýdandary men eldi mekenderin sý basýy múmkin.
Qostanaıda qazirdiń ózinde Tobyl ózeni jaǵalaýdy basyp, baqylaý alańdary sý astynda qaldy. Sý deńgeıi saǵat saıyn kóterilýde. Jergilikti bılik shaǵyn kópirde keptelis bolmas úshin ózen arnasyn jasandy túrde keńeıtip, sý aǵyzatyn aryq jasap jatyr.
Tobyl mańynda ornalasqan úılerdi, saýda ortalyǵy, meıramhana jáne demalys oryndaryn sý basyp qalýy múmkin.
Barlyq aýdan jáne qala ákimderine sý tasqynyna qarsy is-sharalardyń keshendi júrgizilýin qadaǵalaýdy tapsyramyn. Biz tap bolǵan jaǵdaı ońtústik óńirlerdegideı kenetten bolǵan joq, daladan sý kóp keldi. Sizderde barlyq qajetti sharalardy qabyldaýǵa jetkilikti ýaqyt boldy jáne áli de ýaqyt bar. Bir jarym-eki kúndeı qaldy. Osy ýaqyt ishinde zardapty boldyrmaýǵa kúsh salyńyzdar. Eger kimde-kimniń múlkin, úıin nemese kásipornyn sý basyp qalsa, jaýaptylarǵa qatań shara qoldanylady, - dedi Qostanaı oblysynyń ákimi Qumar Aqsaqalov.
Qostanaı oblysynyń aımaqtarynda 25 naýryzdan beri erigen sýmen kúres jalǵasyp jatyr. Sharaǵa myńnan astam adam qatysýda. Sý tasqyny bastalǵannan beri 1284 adam qutqaryldy, onyń 408-i balalar. Resmı derekterge qaraǵanda, sý tasqyny ońtústikten oblys ortalyǵyna birtindep jyljı bastady. Qutqarýshylar sý ótip ketken jerlerde senarı qaıtalanýy múmkin deıdi.
