Tiri bolsam, qazaqqa qyzmet etpeı qoımaımyn!

Álıhan Bókeıhan

Polıseı aryz jazba dedi: 45 jastaǵy erkek 10 jastaǵy er balany zorlamaq bolǵan (VIDEO)

23 sáýir 2024 653

Almatydaǵy Almasıtı shaǵynaýdany Altyn Ordadaǵy úıde qurylysshy kishkentaı uldy úıine aldap kirgizip, zorlamaq bolǵan. Bul týraly Stan.kz portaly jazdy. 

20 sáýirde kúndiz almatylyq Kamıla Tileýqabylqyzynyń uly 1-2 saǵatqa dalaǵa oınaýǵa shyqqan. Bir top bala oınap jatqan kezde jandaryna er adam kelgen. Aıtýlarynsha, ol – osy jerge qurylys isteýge kelgen Qaraqalpaqstan azamaty. 45 jastaǵy er adamnyń 7 balasy bar eken.

“Er adam balalarǵa túrli suraqtar qoıǵan, sózge tartqan. Basqa balalar tarap jatqanda, meniń ulymdy alyp qalyp, kómek surapty. “Qoqystardy tógýge kómektesshi” dep úıine kirýdi suraǵan. Ol maǵan da qolǵabys etip júrgendikten, oǵan da kómek berýge kelisken. Nege kirdiń dep surasam, “kómektespesem, urysa ma dep oıladym” deıdi. Onyń ústine áńgime arasynda “men sport sheberimin, uryp tastaımyn” depti”, – deıdi balanyń anasy.

Úıge kirgen kezde “belim aýyryp qaldy” dep, baladan massaj jasap berýin ótingen. Bala arqasyn ýqalap jatqan kezde er adam ony tartyp, uldyń qolyn óziniń ish kıimine salǵan. Baqytyna oraı, bala aıqaıǵa basyp, teýip, qashyp úlgergen.

“Balam kirip kelgende, “qaıda joǵalyp kettiń?” desem, kózi baqyraıyp, alańǵasarlanyp, jylaǵysy kelip tur. Tóbelesip qaldyń ba, ne boldy dep suraǵanymda, dirildep tur. Qushaqtap, jaımen surap edim, áreń entigip aıtty. “Qorqamyn” dep jylap, óz denesin sıpalaı berdi, óz-ózinen jıirkenip turǵany baıqaldy. “Oǵan barma, ol seni óltirip qoıady, sebebi ol sport sheberi” dep ábden úreılenip qalǵan”, – dedi Kamıla.

Ol birden polısıaǵa habarlaǵan eken, podezdegi beınebaqylaý kameralaryn tekseripti. Sózinshe, bala osydan keıin qorqyp, tipti kóshege shyǵýdan qalǵan.

Soraqysy – polıseıler áıeldi bólek shyǵaryp alyp, aryz jazbaýǵa kóndirgen. Ol Naýryzbaı aýdandyq polısıa bólimshesine barǵan. 

“Shýlatyp ne qylasyz, atyńyzǵa kir keledi. Aryz jazbasańyz qaıtedi, oılanyp kórińiz?” dedi. Sonda ol jazasyz qala ma? Ulymnyń joly bolyp, qashyp úlgerdi. Erteń ol adam bireýdi óltiredi ǵoı. Sonda maǵan “sizde dálel joq qoı, 5 aı boıy anda-mynda súıreleımiz, sosyn báribir ony bosatyp jiberedi” dedi. Ártúrli kabınetterge jibere berdi. Bir kezde “balańyzdyń esh jeri syrylmaǵan, kógermegen” deıdi, sonda ólgende ǵana, zorlaǵanda ǵana kelý kerek pa? dep aıqaıǵa bastym”, – dedi ana.

Sodan keıin áıeldiń aryzyn qabyldap, kúdikti tergeý ızolátoryna jabylǵanyn aıtqan. Biraq kelesi kúni ony kórshiler úıdiń mańynan kóripti. Er adamdy qamaýdan bosatyp jibergen.

“Bir apta buryn sol kisi páterime kiltin tyǵyp, ashqysy keldi. Kúıeýim ekeýmiz úıde boldyq. Kúıeýim esikti ashty da, “ne istep jatyrsyń?” degende ana kúdikti “shatasyp kettim” dedi. Ol bizden joǵary qabatta turady. Terezemiz ashyq ekenin bilip, balalar baryp bilip, ádeıi kelgen ǵoı. Men de aryz jazyp, jábirlengen balanyń anasyna qoldaý kórsetemin. Ol balanyń ornyna kez kelgenimizdiń balasy bolyp qalýy múmkin edi”, – dedi Altyn Orda turǵyny Farıza Qanatova.

Turǵyndar kúdiktiń bostandyqta júrgenine narazy. Ol taǵy da qıturqy áreketin qaıtalaıdy dep qorqady.

“Jer silkinisi, sý tasqyny, endi pedofıl. Ne sumdyq mynaý? 6 balam bar, men olardy asyraýym úshin jumys isteımin. Endi mynandaı bolsa, men ár balamnyń artynan júrip, únemi erip júre almaımyn ǵoı. Eger polısıa jazalamasa, biz ózimiz jazasyn beremiz”, – dedi taǵy bir turǵyn.

Úıge jaýapty Home Servise kompanıasynyń dırektory Ashat Qanaev turǵyn úıdiń qaýipsizdik sharalaryn kúsheıtetinin aıtyp ýádesin berdi. Ol beınebaqylaý kameralaryn kóbeıtip, úıge, balalar alańyna qorshaý salatynyn aıtty. Aıtýynsha, turǵyn úıge jaýapty polısıa bólimshesi joq jáne olardyń jumysynyń álsizdiginen kompanıaǵa shaǵym kóp túsedi.

“Ýchaskelik polısıa 10 kún saıyn aýysady. 7-8 ýchaskelik polısıa aýysqan bolar. Jaýapsyz qalady. Olardy shaqyrýǵa 2-3 saǵat ketedi. 28 úıge bir polısıa jetpeıdi ǵoı. Naýryzbaı aýdandyq polısıasynan ótinerim, polıseıler sanyn kóbeıtse eken”, – dedi ol.

Jábirlengen balanyń anasy oqıǵa bolǵan jerdi, kúdiktiniń úıin, podezdin kórsetti. Qazir úı bos tur.

Sóz arasynda balanyń anasy buǵan deıin de qurylysshylardyń biri oǵan shabýyldamaq bolǵanyn, lıftide qorqytqanyn aıtady. Sózinshe, bul jaǵdaı bir jyl buryn bolypty.

Bir top kórshi polısıa bólimshesine jol tartqan kezde oqıǵa ornyna polısıa qyzmetkeri Ádilbek Qozybekov keldi.

“Sot saraptamasy taǵaıyndaldy. Qylmystyq kodekstiń 121-baby 3-tarmaǵy “Seksýaldyq sıpattaǵy zorlyq-zombylyq áreketter” boıynsha tergeý júrip jatyr. Prokýratýranyń qaýlysymen ony ızolátordan bosatty. Basshylyq quramnyń baqylaýynda”, – dedi Qozybekov.

Bul maqala týraly ne oılaısyz?