Jaqynda Qymbat YouTube arnalardyń birine bergen suhbatynda sheteldikterdiń ne sebepti qazaq balalaryn asyrap alýǵa áýes ekenin aıtqan.
«Qazaqtyń qanynyń tazalyǵy bala asyrap alýdaǵy eń basty krıterııi eken ǵoı. Darhan Qydyráli myrza aıtpaqshy, laı sý iship, qara nan tappaı júrgen Ońtústik Afrıkaǵa, Kenıaǵa balalarymyzdy asyryp jiberetindeı basymyzǵa ne kún týdy? Masqara ǵoı. 30 balanyń izi de joq. Olardy tiri dep oılamaımyn. Shyrqyratyp ekpe salyp, qatyra salǵan shyǵar dep oılaımyn. Nege biz Izraıl bolsyn, Germanıa bolsyn, bul elderde adam aǵzasynyń banki myqty damyǵan dep aıtamyz. Olar da keıin damyǵan úshinshi, tórtinshi elder deıdi ǵoı, múmkin solardyń balalaryn alatyn shyǵar. Kenıalyqtar bizdiń balalardy alyp, solarǵa satyp jibergen shyǵar. Neshe túrli oı keledi», – deıdi ol kúdigin jasyrmaı.
Biraq Janar Baısemizovanyń aıtýynsha, Ońtústik Afrıka Respýblıkasyndaǵy QR elshiliginde konsýldyq esepte 31 qazaqstandyq jetim bala tirkelgen. Biraq balalar kámelettik jasqa tolyp ketkendikten, konsýldyq esepten shyǵarylǵan.
«Olar endi OAR azamattary. Qazirgi ýaqytta konsýldyq esepte qazaqstandyq bir bala bar, onyń jasy 16-da. Asyrap alǵanda júreginde aqaý bolǵan, emdetken, qazir jaǵdaıy jaqsy. Qalǵan balalar da din-aman. Ólmegen, TİRİ! Organǵa ketpegen! OAR-nyń túrli qalasynda turyp jatyr. Olardy aq násildiler asyrap alǵan, kópshiligi evreı. Turmystary jaqsy, arasynda dıplomattar da bar. Qazaqstandyq jetim balalardy asyrap alǵandardyń ishinde qytaılar da bar», – dep jazdy jýrnalıs.
Onyń aıtýynsha, Ońtústik Afrıka Respýblıkasyndaǵy 31 balanyń qujaty 2014 jyly Mysyrdaǵy QR elshiliginen OAR-ǵa berilgeni aıtylǵan. Óıtkeni bul ýaqytqa deıin OAR-da Qazaqstan ókildigi bolmaǵan.
«Osy 31 balanyń úsheýi Kenıada. OAR-daǵy QR Elshiligine 14 memleket qaraıdy, biraq Kenıa joq. Kenıadaǵy qazaqstandyq úsh balany Danıa, Nıderland elderiniń azamattary asyrap alǵan. Olar da din aman. Naırobı qalasynda turady. Jalpy, Ońtústik Afrıka Respýblıkasy – Afrıkadaǵy eń damyǵan el (ınternetten oqyp alyńyzdar). OAR-daǵy 30 shaqty balanyń 11-i qazaq», – deıdi Janar Baısemizova.
Sondaı-aq ol jýrnalıser jalǵan aqparat bermeı, naqty málimet taratý qajettigin alǵa tartty.
«BAQ ókilderi oıyna kelgendi aıta bermeý kerek. Dálel, faktpen sóıleý kerek. OAR qazaqstandyq jetim balalarǵa qatysty taraǵan jalǵan aqparat el ishinde dúrbeleń týǵyzyp jatqan soń, óz paraqsham arqyly osy málimetterdi jarıalap otyrmyn. Elimizdiń Syrtqy ister mınıstrligi, onyń ishinde elshilikter, dıplomattar ózderine júktelgen mindetti durys atqaryp jatyr», – dep jazdy telejýrnalıst.
