NZM basqarma tóraǵasy Ánýar Janǵozın Nazarbaev zıatkerlik mektepterine memleket búdjetinen bólinetin qarajat týraly aıtqan.
– Bul baǵytta ata-analardy tynyshtandyrǵym keledi. Mektepterdiń keleshegi jaıly bizge de kóp suraq qoıylady. Mektepter turǵysynan eshqandaı suraq joq. Granttar sheńberinde úkimet bizdi qorǵap otyr, – deıdi Ulysmedıaǵa bergen suhbatynda Janǵozın.
Onyń aıtýynsha, qarjylandyrýdyń ekinshi kózi – nysanaly salym. Iaǵnı jalpy bilim beretin qarapaıym mektepterde Nazarbaev zıatkerlik mektepterindeı ınfraqurylym joq.
– Zıatkerlik mektepteriniń eń basty ereksheligi – kontentinde. Oqý baǵdarlamasy, baǵalaý júıesi, monıorıng júıesi, syrtqy emtıhandar, kadrlardy daıarlaý júıesi – elde ǵana emes, búkil álemdegi oqý ordalarynan bizdi erekshelendirip turǵan artyqshylyqtar barshylyq. 15 jyl ishinde biz el ishinde ǵana emes, álemde de jetekshi mektepterdiń birine aınaldyq. Sebebi qazir bizdiń túlekterge beriletin sertıfıkattaryn álemniń 60 joǵary oqý oryny moıyndaıdy. Bul neni bildiredi? Kembrıdj, Manchester sıaqty, Qytaıdaǵy birqatar joǵary oqý oryndary bizdiń túlekterdiń sertıfıkatyn kórip, osyndaǵy oqý talaptary ózderiniń talaptaryna tolyǵymen sáıkes keletinin aıtty. Demek, ol joǵary oqý oryndary bizdiń oqýshylardy qosymsha emtıhansyz oqýǵa qabyldaıdy, – deıdi ol.
Ánýar Janǵozınniń sózinshe, dál osy ádistemelik baǵytqa bólinetin qarajat azaıǵan. 2022 jyly bul baǵyttaǵy qarajat 4 ese azaıǵan.
– Biz úshin bul edáýir syn-tegeýrin. Bilim sapasyn arttyrý úshin jumysty qaıta formattaý kerek. Artynsha, sapaly kontent pen sapaly oqý baǵdarlamasyn generasıalap, ilgeriletý mindeti tur. Ekinshi jaǵynan, osynyń bárine biz qazirgi búdjetpen jetýimiz kerek. Jalpy qarjylandyrýdyń qysqarýy biz úshin asa úlken ózgeris dep taǵy aıtpas edim. Qalaı bolǵan jaǵdaıda NZM qurylǵan kezde erte me, kesh pe, búdjet qarjylandyrýy azaıatyny aıtylǵan. Sol sebepti mektepti ózin-ózi aqtaıtyn dárejege jetkizý kerek. Sol sharýamen aınalysyp jatyrmyz. Qazirgi ótpeli ári ózgeriske toly kezeń qarqyndy damýdyń satysy bolar degen senimdemin, – deıdi Janǵozın.
