Azattyqqa Ózbekstannyń quzyrly organdarynan qysym kórdik degen úsh qaraqalpaq azamaty habarlasypty. Olar áleýmettik jelide saıası narazylyq bildirgeni úshin qýdalanǵanyn aıtady. Qalalyq mılısıa mekemesinde 5-8 saǵat ustap, qysym kórsetti deıdi olar.
Bireýiniń sózinshe, ony "túrmege qamalasyń, týystaryńnyń ómiri qıyndaıdy" dep qorqytqan.
MILISIA TERGEÝİ JÁNE QORQYTÝ
Qaraqalpaq azamatynyń biri Dáýletmurat Tájimuratovtyń sýretin Telegram-arnada bólisip, ony "batyr" dep ataǵany úshin mılısıa baqylaýyna túskenin aıtady. Ol byltyr maýsymda Ózbekstannyń joǵarǵy sotynda Tájimuratovtyń apelásıalyq aryzy qanaǵattandyrylmaǵanymen kelispeıtinin osylaı bildirgisi kelgen.
"Terezesi joq qarańǵy bólmege alyp kirip, 4 azamat qorqytty. Ekeýi mılısıa kıiminde boldy. Seni óltirip tastasaq, eshkim bilmeı de qalady dep aıtty" deıdi ol.
Qaraqalpaq azamatynyń sózinshe, quzyrly organ ókilderi ony alyp barǵan jer qalalyq mılısıa mekemesine uqsamaıdy. Ol ony Nókis qalasynyń shetindegi "terezesi synyp, qańyrap bos turǵan eski ǵımarat" dep sýretteıdi.
Jergilikti mılısıa qaraqalpaq azamatyna týystaryna habar berýge, advokat jaldaýǵa, tipti, aıyptaýlarǵa qatysty qarsy sóıleýge tyıym salǵan.
Azattyq bul boıynsha Ózbekstan joǵarǵy sotyna jáne ishki ister mınıstrligine hat joldapty. Ázirge jaýap kelmegen.
Ortalyq Azıadaǵy adam quqyqtary máselelerin zertteıtin halyqaralyq Human Rights Watch uıymynyń Tashkenttegi, Almaty men Bishkektegi keńselerin basqarǵan Stıv Sverdlov munyń bári Ózbekstannyń burynǵy prezıdenti Islam Karımovten qalǵan "mura" deıdi.
"Ózbekstanda 2016 jyly bılik aýysqanymen eldegi adam quqyqtarynyń saqtalýyna qatysty reforma júrgizilmedi. Mırzıaev ákimshiligi basynda syndy ashyq qabyldaımyz degenimen, keıin jýrnalıser men blogerlerge qysym kórsete bastady" deıdi sarapshy.
