M.Baqtıaruly: Oqýlyq bızneske aınalyp ketti. Depýtattyq saýalymda aıtqanmyn, oqýlyqty belgili bir memlekettik organ jasaýy kerek. Al biz olaı jasaǵan joqpyz. Kókpar tartqandaı, básekege saldyq ta jiberdik. Ár baspa ózderi avtor taýyp oqýlyq jazdyrady, ózderi dızaıner taýyp jasatady, ózderi basyp shyǵarady. Naryq zamanynda bul bylaı durys sıaqty kórinedi. Biraq olaı bolmaý kerek. Oqýlyqty ár pedagog ózinshe jazyp, ár baspa ózinshe shyǵarsa, bilim ala-qula, oqýshy da birdeı bilim almaıdy. Sondyqtan, memleket mundaı alaqulalyqqa jol bermeý kerek. Oqýlyq bir ortalyqta jazylyp, bir ǵana baspadan shyǵý kerek. Ol memlekettik bolý kerek. Jeke menshik degen bilim salasyna jaramaıdy.
Keńes úkimeti kezinde «Mektep» baspasy degen boldy. Ybyraı Altynsarın degen ǵylmı zertteý ınstıtýty boldy. Sol ortalyqta myqty-myqty pedagog mamandar jumys istedi. Oqýlyqtyń konsepsıasyn solar jasaıtyn. Bir oqýlyq 10 jylǵa deıin jetetin. Al biz jyl saıyn jańa oqýlyq jazdyramyz. Memleketten mıllıardtaǵan aqsha alady. Sondyqtan, oqýlyqty memleket qolyna alý kerek. Jeke menshik baspaǵa balanyń taǵdyryn senip tapsyrýǵa bolmaıdy. Bala osy eldiń, osy memlekettiń bolashaǵy. Oqýlyq, birinshi kezekte bilim, odan keıin tárbıe, sosyn ıdeıalogıa. Sondyqtan, ony memleket ózi qolyna alyp, bir ortalyqtan shyǵarýy qajet. Ol ortalyqta eń bilimdi pedagog, bilikti ǵalym, myqty redaktor, sheber dızaıner jumys isteýi kerek. Joǵary jalaqy tólenýi kerek.
