Qarjy monıtorıńi agenttigi jumysyn toqtatqan Delta Bank-tiń top-menedjerlerine qatysty tergeýdi aıaqtady.
«2012-2017 jyldar aralyǵynda astyq olıgarhy Nurlan Tileýbaev bank qarajatyn qaıtarymsyz nesıeler joly arqyly zańsyz shyǵarǵanyn anyqtaǵan. Nurlan Tileýbaev banktiń aksıoneri bolǵan» dedi Qarjylyq monıtorıń tobynyń asa mańyzdy ister jónindegi tergeýshisi Saltanat Kósherbaeva.
Tergeý kezinde Tileýbaev pen onyń jaqyndarynyń jalpy quny 48 mlrd teńgeden asatyn múlki tárkilendi. Atap aıtqanda, bes qant zaýyty, 20-dan astam jer telimi, 70 jyljymaıtyn múlik nysany, 40 kólik.
Tileýbaevtyń Birikken Arab Ámirlikterinde, Reseı Federasıasynda, Latvıa men Chehıada ornalasqan aktıvteri buǵattalǵan.
«Qylmystyq áreketten kelgen shyǵyn 200 mlrd teńge, 200 mln dollar jáne 4 mln eýrony qurady. Qylmystyq is sotqa joldanyp, sottalýshylar qamaýǵa alyndy» dep qosty Saltanat Kósherbaeva.
Eske salsaq, Nurlan Tileýbaev Delta Bank-ten bólek úsh bankten (Bank RBK, Eýrazıalyq bank jáne Qazaq Banki) jymqyrý isi boıynsha jazasyn ótep jatyr. 2021 jyldyń naýryz aıynda sot ony jáne eks-bankır Jomart Ertaevty toǵyz jylǵa bas bostandyǵynan aıyrǵan.
Derekkóz
