Ekologıa jáne tabıǵı resýrstar mınıstrliginiń kıik sanyn retteýmen baılanysty buıryq jobasy jarıalandy.Bul qujat arqyly sanyn retteýge jatatyn janýarlardyń túrlerin alyp qoıýǵa ruqsat berý qaǵıdalaryna ózgeris engizý kózdelgen.
Buıryq jobasy sany retteletin janýar túrin alyp qoıýǵa memleketten ruqsat alý úshin jazylatyn ótinim úlgisine jáne sol ótinim negizinde ruqsat berý qujatynyń úlgisine ózgeris engizýge arnalǵan.
«Janýarlar sanyn retteý ýchaskesiniń aýdany jáne shekarasy» degen tarmaqtyń aıaǵyna «(aqbókenniń sanyn retteýdi qospaǵanda)» deıtin qosymsha tirkes engizilmek.
Orman sharýashylyǵy jáne janýarlar dúnıesi komıtetiniń mamandary bul ózgeris kıik sanyn retteý saıasatyndaǵy sońǵy ózgeristermen baılanysty usynylyp otyrǵanyn aıtady.
Buıryqtaǵy ózgeris kıik atýǵa ruqsatty shektegenimen tyıym salý bolyp eseptelmeıdi.
«Aqbókender sany retteýge jatatyn janýarlardyń túrine jatqyzylǵanyn bilesizder. Biraq sońǵy kezde osy máseleniń aınalasyndaǵy ustanymdar qaıta qaralyp jatyr. Osyǵan baılanysty sany retteletin janýarlardyń ishinde kıik atýǵa ruqsat berilmeıdi. Biraq bul tolyqtaı tyıym salý degen sóz emes. Memleket tarapynan naqty sheshim shyqqannan keıin baryp kıik atýǵa tolyq tyıym salynýy da múmkin», - deıdi komıtettiń janýarlar dúnıesi jáne ańshylyq sharýashylyq basqarmasynyń bas sarapshysy Oljabek Holov.
Qazaqstanda 10 aqpannan bastap kıik atýǵa qaıtadan tyıym salynǵan bolatyn.
Alaıda, bıyl kúzde Qazaqstanda kıik atýǵa qaıta ruqsat etiletini týraly Samarqanda ótken únemi qonys aýdaryp tirshilik etetin jabaıy janýar túrlerin saqtaý konvensıasynyń kezekti otyrysynda QR Ekologıa jáne tabıǵı resýrstar vıse-mınıstri Nurken Shárbıev málimdegen.
Ekologıa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıteti tóraǵasynyń mindetin atqarýshy Danıar Turǵambaev kıik sanyn memleket rettemese, kıiktiń kóbeıýi sharýalarǵa zıan tıgizedi degen pikir aıtqan.
Alaıda, Prezıdent Qasym-Jomart Toqaev Qostanaı óńirindegi sapary kezinde aqbókenderdi atýǵa tyıym salynatynyn málimdedi. Sondaı-aq, bıyl mamyrda elimiz boıynsha kıik sanaǵy júredi.
