Reseıdiń Etnoulttyq strategıalar agenttiginiń Dırektory Aleksandr Kobrınskııdiń pikirinshe, Kreml úshin qazir Imanǵalı Tasmaǵambetovtiń kandıdatýrasy qolaılyraq kórinedi. Óıtkeni, ol sońǵy kezderi Reseıden irgesin aýlaq sala bastaǵan Toqaevqa qaraǵanda, Tasmaǵambetovti áldeqaıda reseıshil saıasatker dep esepteıdi. Sarapshy Qazaqstanda qarasha aıynda ótetin saılaýǵa baılanysty NG («Novaıa Gazeta») basylymyna osyndaı pikir bildirgen.
Onyń aıtýynsha, Toqaevqa básekeles bola altyn jalǵyz adam – Imanǵalı Tasmaǵambetov. Onyń memlekettik jáne dıplomatıalyq qyzmettegi úlken tájirıbesine, Qazaqstanda tanymal ári syıly ekenine, bastysy, qoǵamnyń teris qabaq tanytpaıtyna erekshe toqtalypty.
Dese de, sarapshy Kremldiń bul saılaýǵa Tasmaǵambetovti qolynan jetektep kelip, «bizdiń úkilegen úmitkerimiz – osy» dep dodaǵa qosýy neǵaıbyl ekenin jasyrmaǵan.
«Biraq onyń (Tasmaǵambetov – red.) prezıdenttik saılaýǵa qatysatyny, Kremldiń bul saılaýǵa yqpal etetini – óz aldyna bólek másele», – dep túıindeıdi reseılik sarapshy.
Ras, Qazaqstannyń Reseıdegi burynǵy elshisi de ázirge saılaýǵa túsetin nıetin jarıa etken joq. Nazarbaev dáýiriniń aıaq tusynda qyzmetinen ketkennen beri, saıasat sahnasyna shyqqan emes. Saq júrdi. Saıaq júrdi. Dese de, soltústik kórshi eldiń bıznes, saıası qaıratkerlerimen qarym-qatynasy ornatyp, yń-shyńsyz jan-jaǵyn bútindegeni qupıa emes.
K.Másimov pen I.Tasmaǵambetov. Foto: ǵalamtordan
Aleksandr Kobrınskıı Tasmaǵambetovti kókke kóterip, Toqaevty tómendetkenimen, qazirgi prezıdenttiń qaıta saılanýyna eshqandaı qaýip joq ekenin moıyndaıdy. Óıtkeni, olıgarhtardyń áýletteri, Aqordanyń qarsylastary ortaq kandıdat usyna almaıdy. Demek, Toqaev shappaı báıge almaq.
Tasmaǵambetovtiń kimge bolsa da, adýyndy qarsylas bola alatyny anyq. Nazarbaevtyń komandasynan shettetilgenine de osy erekshe harızmasy sebep boldy. Tynysh jatsa da, Prezıdent ákimshiligin Tasmaǵambetovtiń tulǵasy ábigerge salary anyq. Al Kreml saqa etip saılap, oıynǵa salý nıetin jylt etkizse, onda munyń jóni múlde bólek.
Máselen, keıbir Aqordamen etene telegram arnalar «Reseıdiń Tasmaǵambetovti Qazaqstannyń UQSHU-daǵy ókili retinde kórýdi qalap otyrǵanyn» meńzep, sybys taratyp otyr.
Al Tasmaǵambetov osyǵan deıin ózin qazaqtildi, ultjandy ári isker azamat retinde ımıj qalyptastyrdy. Sondyqtan ony reseıshil saıasatker retinde kózge elestetý qıyndaý. Saıasattan da syrt qaldy. Esimi el jadynan kómeskelenip barady. Árıne, Kreml bás tikse, bári ózgerýi múmkin.
Rasymen de, Kreml Toqaevtan kóńili qalyp, Tasmaǵambetovke ıek artyp otyr ma? Álde, aıtqanyna kónip, aıdaýyna júrmegen Aqordaǵa qyr kórsetkeni me? Áıteýir, sońǵy kezderi ózi kópshiliktiń aldyna shyqpasa da, saılaý jaqyndaǵan saıyn Tasmaǵambetovtiń esimi jıi aýyzǵa iligip júr.
Endi mine, reseılik BAQ-tar otqa maı quıa bastaǵandaı.
https://nege.kz/
