Eldegi bolyp jatqan sý apaty jaıly qanshama aqparattar, vıdeolar vatsap, ınstagram sıaqty jelilerden kún saıyn kelip jatyr. Endi solardyń bireýi shyn bolsa, ekinshisi jalǵan. Kelgen vıdeony anyq-qanyǵyna jetip almaı taratpasańdarshy qazaqtar-aý...
Resmı saıttardyń aqparaty bolsa durys, siltemesin qosa salyńdar. Onsyz da dúrlikken jurtty ózderińniń kózderiń jetpegen dúnıemen shoshyta berip ne kerek?
Durys, túsinem úıleri sýda qalǵan aǵaıynǵa ońaı bolyp jatqan joq. Biraq memleket olardy dalaǵa tastamaıdy ǵoı. Adam aman bolsa úı de, dúnıe múlik te, mal da tabylar.
Ókimet te, elimizge belgili ánshiler, blogerler, kásipkerler de, tipti qarapaıym halyq ta aıanyp qalyp jatqan joq, qoldarynan kelgen kómekterin berip jatyr.
Kúrishtiń arqasynda kúrmek sý ishedi demekshi, ókinishke qaraı bul apattan da óz paıdalaryn jasap qalyp jatqan adamdar joq emes.
Sol úshin qınalǵan aǵaıynǵa járdem bergisi keletinder, álemjelidegi ádemi jazbasyna qarap, oqyrmany kóp eken dep kim ekenin bilip almaı jatyp aqsha aýdara salmaı, resmı qorlardy izdep taýyp aýdarǵan durys-aý.
Qazaqtar eski zamandaǵy kórgen azabyn aıtpaǵanda, toqsanynshy jyldardyń qıyndyǵy men keshegi kovıdti de jeńip ótti ǵoı. Sý tasqyny da qaıtyp, bul kúnderdi de kórmegendeı bolyp ketemiz áli. Aldaǵy kúnnen úmit úzbeıik. Birligimiz máńgi bolsyn Qazaq eli!
