Bul týraly Parlament Májilisiniń jalpy otyrysynda depýtat Erlan Saıyrov Premer-mınıstrdiń orynbasary Eraly Toǵjanovqa Qazaqstannyń basty áleýmettik problemasynyń biregeıi – halyqtyń basym bóliginiń kedeıligi týraly máseleni kóterdi.
«Dúnıejúzilik bank álemdegi kedeıliktiń eki shegin qarastyrǵan: tabysy ortashadan tómen elder úshin kúnine bir adamǵa 3,2 AQSH dollary, tabysy ortashadan joǵary elder úshin 5,5 AQSH dollary. Al Qazaqstanda eń tómengi kúnkóris deńgeıi 2,8 dollardy quraıdy, Reseıde kúnine 6 dollar. Eń tómengi kúnkóris deńgeıi óte tómen bolǵannyń ózinde 2021 jyly tabysy kúnkóris deńgeıinen tómen adamdar sany resmı túrde 998 myń adam boldy. Al beıresmı sarapshylar bul kórsetkishtiń 1,5 mln, tipti odan da joǵary ekendigin aıtady», - deıdi depýtat.
Onyń sózinshe, İshki jalpy ónimniń eselep ósýine qaramastan Qazaqstan ondaǵan jyldar boıy, kedeılik shegin kótermeı keledi. Búginde Qazaqstan kúnkóris deńgeıi álemdegi eń tómen elderdiń biri jáne Nıgerıa, Angola, Venesýela, Gabon sıaqty elderdiń qatarynda tur. Al Eýropalyq elderde kedeılik ortasha tabystyń 60% deńgeıinde belgilenedi.
«Sonymen birge, pandemıa bastalǵannan beri turmysy tómen úı sharýashylyqtarynyń qarjysyna nuqsan keltiretin ınflásıanyń ósýine baılanysty áleýmettik tólemderdiń tıimdiligi tómendedi. Mysaly, Qazaqstanda halyqtyń eń az qamtylǵan 40 paıyzy óz búdjetiniń 59 paıyzyn azyq-túlik ónimderine jumsaıdy. Keı kezderi bul kórsetkish odan da joǵary. Elimizde azamattardyń tómen áleýmettik jaǵdaıynyń eki ındıkatory bar – eń tómengi kúnkóris shegi jáne kedeılik shegi. Kedeılik shegi, eń tómengi kúkóris sheginiń, ıaǵnı 36 myń teńgeniń 70 paıyzyn quraıdy», - deıdi depýtat.
