Tiri bolsam, qazaqqa qyzmet etpeı qoımaımyn!

Álıhan Bókeıhan

Ulttyq bank bazalyq mólsherlemeni 10,25%-ǵa deıin kóterdi

24 qańtar 2022 113

Respýblıka Ulttyq Bankiniń aqsha-kredıt saıasaty jónindegi komıteti bazalyq mólsherlemeni jyldyq 10,25% deńgeıinde belgileý týraly sheshim qabyldady, dep habarlaıdy Azattyq Rýhy.

 


Tıisinshe, ótimdilikti usyný jónindegi turaqty qoljetimdi operasıalar boıynsha mólsherleme 11,25%, al ótimdilikti alý jónindegi turaqty qoljetimdi operasıalar boıynsha mólsherleme – 9,25% bolady.

«Sheshim ınflásıalyq kútýlerdi tómendetý jáne ınflásıanyń 2022 jyldyń sońyna qaraı belgilengen 4-6% nysanaly dálizge kirý qajettiligin eskere otyryp qabyldandy», - dep túsindirdi Ulttyq banktiń baspasóz qyzmeti.


Munda álemniń kóptegen ekonomıkalarynda, onyń ishinde Qazaqstannyń negizgi saýda seriktesteri bolyp sanalatyn elderde ınflásıa joǵary deńgeıde bolýyn jalǵastyrýda, al ishki konúnktýra sońǵy aılarda dezınflásıalyq prosesterdiń bolýyna qaramastan, suranys jaǵynan da, usynys jaǵynan da aıtarlyqtaı proınflásıalyq táýekelderdiń bolýymen sıpattalady.

Ulttyq Bankte 2021 jylǵy jeltoqsanda Qazaqstanda jyldyq ınflásıa 8,4%-ǵa deıin tómendegenin eske saldy. Azyq-túlik ınflásıasy jyldyq mánde 9,9%-ǵa deıin aıtarlyqtaı tómendedi. Retteýshi muny ınflásıaǵa qarsy den qoıý sharalaryn iske asyrýmen jáne jekelegen azyq-túlik taýarlaryna joǵary aılyq mánderdiń jyldyq ınflásıasyn esepteýden shyǵýmen baılanystyrady.

Sonymen qatar, azyq-túlik emes ınflásıa 2021 jylǵy jeltoqsan qorytyndysy boıynsha 8,5%-ǵa deıin jedeldedi, jyldyq azyq-túlik emes ınflásıanyń mundaı joǵary máni 2018 jylǵy mamyrdan bastap alǵash ret baıqalady. Janar-jaǵar maıǵa (23,2%), avtomobılderge (14,7%) jáne qatty otynǵa (9,5%), onyń ishinde kómirge (9,8%) baǵanyń ósýi negizgi úles qosady.

Benzın baǵasynyń jyldyq ósýi 19,6%-ǵa, dızel otyny 46,5%-ǵa jedeldedi. Aqyly qyzmetterdiń jyldyq ınflásıasy 2021 jylǵy jeltoqsanda retteletin komýnaldyq qyzmetterge, shashtarazdar, meıramhanalar men qonaq úıler qyzmetterine baǵalardyń neǵurlym qalypty ósýi aıasynda 6,5%-ǵa deıin baıaýlady (2021 jylǵy qazan – 6,9%, 2020 jylǵy jeltoqsan – 4,2%).

Ortalyq jylý men ystyq sý tarıfteriniń tómendeýi nátıjesinde retteletin komýnaldyq qyzmetter tarıfteriniń ósýi 4,1%-ǵa deıin birshama baıaýlady. Bul rette ósý qarqyny 2020 jylǵy jeltoqsan deńgeıinen áli de asyp túsedi. Turǵyn úıdi jaldaý qunynyń belsendi ósýi jalǵasýda (2021 jylǵy jeltoqsanda 19,8%). Sondaı-aq, suranystyń artýyna baılanysty 2021 jylǵy jeltoqsanda Kólik qyzmetteriniń jekelegen túrlerine baǵanyń kúrt ósýi baıqaldy.

«Bazalyq ınflásıanyń traektorıasy ınflásıalyq prosesterdiń baıaýlaýynyń turaqsyzdyǵyn kórsetedi. 2021 jylǵy tamyz-qarashadaǵy baıaýlaýdan keıin bazalyq ınflásıanyń ártúrli baǵalaýlary nysanaly dálizden joǵary qalyptasyp, 2021 jylǵy jeltoqsanda jedeldetýdi taǵy da kórsetedi. Bul rettelmeıtin taýarlar men qyzmetter baǵasynyń joǵary ósýine baılanysty», - delingen habarlamada.


Aqsha-kredıt saıasaty jónindegi komıtettiń bazalyq mólsherleme boıynsha kezekti josparly sheshimi 9 naýryzda saǵat 15:00-de jarıalanady.

Bul maqala týraly ne oılaısyz?