Astanada ótip jatqan «Qazaqstandaǵy atom energetıkasynyń damý perspektıvalary» forýmynyń ekinshi paneldik sesıasynda spıkerler atom energetıkasynyń paıdasy týraly baıandady, dep habarlaıdy QazAqparat.
Atom elektr energıasynyń turaqty kózin qamtamasyz etýdiń joly ǵana emes, sonymen qatar, ekonomıkanyń sabaqtas salalaryn damytýdyń qýatty katalızatory ekenin atap ótti.
Atom elektr stansasy sıaqty aýqymdy jáne bilimdi qajet etetin jobany júzege asyrý energetıkanyń, qurylystyń, ǵylymnyń jáne taǵy basqa zamanaýı tehnologıalar sıaqty salalardyń damýyna septigi tıetini aıtyldy.
«Qazaqstanda atom elektr stansasyn salý máselesi turǵyndar arasynda biraz kúmán týdyrady. Kóbi onyń artyqshylyqtaryn bile bermeıdi. Ókinishke qaraı, halyq atom energıasyn engizýdiń naqty ekonomıkalyq paıdasy jóninde habarsyz. Elimizdiń kemel keleshegin oılasaq, energıa tapshylyǵy men energıaǵa táýeldilikten arylý mańyzdy. Qısyndy qadamdardyń biri — atom elektr stansasyn salý», — dedi talqy barysynda Qazaqstannyń azamattyq alánsynyń prezıdenti Baný Nurǵazıeva.
Spıkerler atom elektr stansalarynyń qurylysyna qarsy shyqqan jaǵdaıda energetıka salasynda úlken nátıjege jetkizý qıyn ekenin jetkizdi.
«Óz basym naqty sheshimge keldim: AES halyqqa eshqandaı qaýip tóndirmeıdi. Ol qorshaǵan ortaǵa da zıany joq. Buǵan Almaty men Kýrchatovtaǵy ǵylymı-zertteý reaktorlarynyń tájirıbesi dálel», — dep atap ótti forým moderatory, «Atameken» UKP basqarýshy dırektory, Qazaqstan Respýblıkasynyń eńbek sińirgen energetıgi Jaqyp Haırýshev.
