Birikken Arab ámirliginde qazaq qyzdyń máıiti tabyldy, dep habarlaıdy Alash.kz ulttyq portaly.
Súıiktisi Iana esimdi qazaq qyzyn BAÁ elinde aıaýsyz óltirgen. Denesin chemodanǵa salyp, eldiń shalǵaı betine tastaı salǵan. Bul týraly Barys Media YouTube arnasy málimdedi.
Iana Beısembaeva qorlyq kórsetýden taıynbaıtyn ǵashyǵynan qutylý maqsatynda BAÁ-ge jumysqa ketken.
"Iana óte aqjarqyn, qabiletti qyz edi. Qytaıda bilim alyp, sol jerde jumys istedi. Atyraýda da jumys istedi. Óte belsendi edi", - deıdi Iananyń qurbysy.
Úsh jyl buryn tanysqan jigitiniń 3 jasar balasy, otbasy bar ekeninen beıhabar bolǵan.
"Jigittiń 3 balasy, otbasy bar bolyp shyqty. Áıeli óte óktemshil kelinshek bolǵan. Áıeli Ianaǵa jazdy, maǵan da jıi jaza beretin", - deıdi Iananyń qurbysy.
Jigit Iana Beısembaevany qyzǵanyp, urýdy bastaıdy. Qarym-qatynastan eshteńe shyqpaıtynyn uqqan Iana jigitpen aıyrylysýǵa sheshim qabyldaıdy. Biraq jigit qyzdyń izinen qalmaıdy.
"Ianany izdep úıge deıin keletin. "Ket" dese, ketpeıtin. It úrse de, biz aıqaılasaq ta ketpeı turyp alatyn", - deıdi Arman Beısembaev.
Iana BAÁ ketpesten buryn jigiti ony zorlaǵany týraly polısıa qyzmetkerlerine aryz jazǵan. Alaıda, ol aryzdy qaıta alǵan. Keıin qalaı qutylaryn bilmegen ol Dýbaıǵa ushyp ketken.
Jigit Ianany izdep, Birikken Arab ámirligine barǵan. Ol ushaqtan túse sala, Iana jumys isteıtin mekemege barady.
Dýbaı prokýratýrasynyń tergeýi boıynsha, er adam Ianany pyshaqtap óltirgen. Ol alǵashynda ıyǵy men qolyna pyshaq suqqan. Iana qashýǵa tyrysqanda, jigit ashýǵa býlyǵyp, denesiniń barlyq jerine pyshaq suǵyp tastaǵan. Keıin Iananyń qaza bolǵanyn kórip, chemodanǵa salyp shalǵaı eldi-mekenge laqtyryp ketken.
