Aqtóbe qalasynda 8-synyp oqýshysy álimjettik qurbany boldy. Ol kolej stýdentterinen taıaq jep, esinen tanyp, keıin qaıtys boldy. Ákesi Qaırat Qaınazarov ádildik izdep, ulynyń álimjettiktiń kesirinen qaza bolǵanyn baıandady, dep habarlaıdy Alash.kz Sputnik.kz saıtyna silteme jasap.
"Meniń ulym Beksultan – egizdiń syńary. Uldarymdy Alla maǵan bes qyzdan keıin duǵalaryma jaýap retinde jiberdi. Egizim – Beksultan men Ersultan sport mektebinde birge oqydy. Ekeýi de erkin kúresten sport sheberine úmitker. 2022 jyly Eset batyr atyndaǵy sport mektep-ınternatyna qabyldandy. Bul mekeme olımpıadalyq rezervte, balalar sonda oqıdy jáne turady", – deıdi Qaırat Qaınazarov.
Qaıǵyly oqıǵa 11 sáýirde bolǵan.
"Keshki saǵat 18:00-den keıin jataqhananyń barlyq qyzmetkeri úıine qaıtady. Tárbıeshiler ketkennen keıin oqýshylar óz isterine kiristi. 9 jáne 10-synyp oqýshylary, kolej stýdentteri jınalyp, bólmege 10 balany ákeledi. Olar donerge aqsha talap etken, bular bermegen. Sóıtip sol jerde uryp-soqqan", – deıdi Qaırat Qaınazarov.
Beksultan qaıtys bolǵan kúni anasy uzaq saparǵa shyqqan. Biraq bári josparlanǵandaı bolmady. Ana júregi balasyn máńgige joǵaltatynyn sezbedi.
"Keshe 10 baladan da polısıa jaýap aldy. Meniń ulym soqqydan qaıtys boldy, ınternettegi barlyq aqparat ótirik. Soqqy ulymnyń júregine tıgen, ony tizemen júrekten tepken, sarapshy tamyrlary jarylyp ketkenin aıtty", – dep túsindirdi marqumnyń ákesi.
Beksultannyń baýyry Ersultan da soqqyǵa jyǵyldy. Onyń kóz aldynda baýyry qaza boldy.
"Qazir Ersultannyń jaǵdaıy aýyr. Munyń bári onyń kóz aldynda boldy. Ulymnyń psıhıkasy buzyldy, aýyryp jatyr. Ony uryp-soqqan, qasynda turǵan balalar, muǵalim, dırektor – árkim óz jazasyn alsyn. Álimjettik 10 kúnde bola qoıǵan joq, bul burynnan qalyptasqan júıe", — deıdi qaıǵydan qan jutqan áke.
Aqtóbe oblysy polısıa departamentiniń málimetinshe, densaýlyqqa qasaqana aýyr zıan keltirý faktisi boıynsha sotqa deıingi tergeý bastaldy. Sondaı-aq sport mektebiniń qyzmetkerlerine qatysty óz qyzmettik mindetterin durys atqarmaý faktisi boıynsha sotqa deıingi tergeý júrgiziledi.
Qaza tapqan 14 jasar Beksultan Ábýbákirdiń denesi jer qoınaýyna tapsyryldy.
Aqtóbede sport mektebiniń segizinshi synyp oqýshysyn ózinen bir-eki jas úlken uldar uryp óltirgen. Muny kýágerler de, saraptama da rastady. Qazir kúdikke ilingen balalar qamaýda otyr. Ulynan aıyrylǵan ata-ana jaýyzdyqqa barǵan jasóspirimderdi de, alǵashynda qylmysty barynsha jasyrǵan bilim oshaǵynyń basshylaryn da qatań jazalaýdy suraıdy.
