Tiri bolsam, qazaqqa qyzmet etpeı qoımaımyn!

Álıhan Bókeıhan

"Qulsaryda qarýly top adamdardy kepilge alyp, aqsha talap etip jatyr". Polısıa kúdiktini ustady

15 sáýir 2024 639

3 óńirde jalǵan aqparat taratýshylar ustaldy, dep habarlady alash.kz saıty Polisia.kz ke siltep.

Mańǵystaý oblysynyń PD jedel basqarý ortalyǵyna sý tasqyny aımaǵynan evakýasıalanǵan Qulsary qalasynyń turǵyndaryn qonaq úılerdiń birinde qarýly adamdar kepilge alyp, aqsha talap etip jatyr degen aqparat túsken. Tekseris barysynda bul aqparat jalǵan bolyp shyqty.

Oblystyq PD ekstremızmge qarsy is-qımyl basqarmasynyń qyzmetkerleri qabyldaǵan sharalar nátıjesinde Beıneý kentinde jalǵan qońyraý shalǵany úshin 22 jastaǵy qyz ustaldy. Buǵan deıin avtobýsta onyń uıaly telefon urlaǵany anyqtaldy. Ol qoldy bolǵan gadjetten qońyraý shalǵan.

Qazir kúdiktige bóten múlikti urlaý jáne terorızm aktisi týraly kórineý jalǵan habarlama berý boıynsha sotqa deıingi tergeý júrgizilip jatyr.

Sondaı-aq 15 sáýirde Aqtóbe qalasynyń polısıasyna er adam uıaly telefonnan qońyraý shalyp, Grıshın kóshesindegi úıge bomba qoıylǵanyn aıtqan. Bul fakti de rastalmady.

Aqtóbe oblysy PD ekstremızmge qarsy is-qımyl basqarmasynyń qyzmetkerleri buryn da osyndaı qylmys úshin sottalǵan Aqtóbe qalasynyń jumys istemeıtin turǵynyn mas kúıinde ustady. Onyń ústinen terorızm aktisi týraly kórineý jalǵan aqparat berý boıynsha qylmystyq is qozǵaldy.

Jalǵan terorızmniń úshinshi deregi Almaty qalasynda tirkeldi. Onda qalanyń jeke kompanıalarynyń biriniń telefonyna WhatsApp messendjeri arqyly iri aqshalaı syıaqy úshin saýda ortalyǵyna bomba qoıylǵany týraly habarlama túsken.

Jedel-izdestirý is-sharalaryn ótkizý barysynda Jetisý oblysy PD EQİQB qyzmetkerleri Taldyqorǵan qalasynyń 9 jasar turǵynyn anyqtady. Onyń ınternet jelisinde kompanıanyń jarnamasyn kórip, osy habarlamany buzaqylyq nıetpen joldaǵany anyqtaldy.

Kámeletke tolmaǵan balanyń ata-anasy balany tárbıeleý sharalaryn qabyldamaǵany úshin ákimshilik jaýapkershilikke tartyldy.

İİM Qylmystyq kodekstegi osy qylmys úshin 5 myń AEK (18 mln teńge) mólsherinde aıyppul ne bolmasa 5 jylǵa deıin bas bostandyǵyn shekteý nemese bas bostandyǵynan aıyrý jazasy kózdelgenin eskertedi.

Sondaı-aq sot sheshimi boıynsha kináli adam jeke jáne zańdy tulǵalarǵa keltirilgen zalaldy óteýge tıis.

Bul maqala týraly ne oılaısyz?