Tiri bolsam, qazaqqa qyzmet etpeı qoımaımyn!

Álıhan Bókeıhan

B.Nazarbaev pen Q.Sháripbaevqa qatysy bar zańsyz maınıng fermalary jumysyn toqtatty

15 naýryz 2022 103
Qazaqstannyń burynǵy prezıdenti Nursultan Nazarbaevtyń inisi Bolat Nazarbaev pen kúıeý balasy Qaırat Sháripbaevqa qatysy bar zańsyz maınıng fermalary tabylǵan. Bul habardy Qarjy monıtorıńi agenttigi taratty.



Agenttik habaryna qaraǵanda, zańsyz maınıng ferma qurǵandar arasynda belgili bıznesmender men burynǵy joǵary laýazymdy sheneýnikterdiń aty-jóni bar. Pavlodar oblysynda Bolat Nazarbaev pen Aleksandr Klebanovqa (parlament májilisiniń úsh shaqyrylymyna depýtat bolǵan Dará Klebanovanyń kúıeýi - red.), Aqtóbe oblysynda Qaırat Sháripbaevqa, Qaraǵandy oblysynda Erlan Nyǵmatýlınge (parlament májilisiniń burynǵy tóraǵasy Nurlan Nyǵmatýlınniń baýyry - red.) qatysy bar zańsyz maınıng fermalar anyqtalǵan.

- Tekseris barysynda 55 maınıng ferma jumysyn óz erkimen tolyq toqtatyp, qural-jabdyqtaryn alyp tastady. Onyń qaıtadan iske qosýǵa jol berilmeıdi. 51 kompanıa zańsyz jumys istegen. Olar elektr qýatyna zańsyz qosylǵan, arnaıy ekonomıkalyq aımaqtarǵa zańsyz ornalasqan jáne salyq pen keden alymynan jaltarǵan. Olardyń bári elektr qýatynan ajyratyldy,- deıdi Qarjy monıtorıńi agenttigi.

Agenttik málimetinshe, Qaraǵandy oblysyndaǵy maınıng kompanıa "Saryarqa" arnaýly ekonomıkalyq aımaǵyna ornalasqan. Pavlodar oblysynda jylyjaımen aınalysatyn eki kompanıa ózine tıesili elektr qýatyn úshinshi tulǵaǵa lısenzıasyz satqan.

"Zańsyz maınıng fermalardyń birine Forbes.kz tizimi boıynsha Qazaqstanda baılyǵy jóninen 17-orynda turǵan Qaırat Itemgenovtiń qatysy bar. İshki ister mınıstrligi departamentiniń burynǵy tóraǵasy Tilegen Matkenovpen baılanysy bar kompanıalar da zańsyz maınıngpen shuǵyldanǵan",- deıdi Qarjy monıtoıngi agenttigi.

Agenttik málimetine qaraǵanda, maınıng qural-jabdyqtary Ońtústik Koreıa, Túrkıa, Grýzıa, Sıngapýr, Qytaıdan ákelingen. Keıbiri kontrabandamen jetkizilgen. Almatydaǵy maınıng fermalarǵa 2,8 mıllıard teńge turatyn myńnan astam maınıng jabdyǵy Qytaıdan zańsyz jolmen kirgizilgen.

Agenttik málimetinshe, osy isterge baılanysty 25 qylmystyq is qozǵalyp, quny 100 mıllıard teńgeden asatyn qural-jabdyq tárkilengen. Zańsyz maınıngpen aınalysatyn fermalardy tekserý nátıjesinde Qazaqstan táýlik boıy tutynatyn elekt qýaty saǵatyna 600 Megavattqa túsken.

Qazaqstanda keıingi kezderi elektr qýatynyń tapshylyǵy týraly jıi sóz bola bastaǵan edi. Osyǵan baılanysty atom elektr stansıasyn salý jóninde bastamalar kóterilgen.

Qańtar oqıǵasynan keıin Qazaqstannyń burynǵy prezıdenti Nursultan Nazarbaev qaýipsizdik keńesiniń ómir boıǵy tóraǵasy quqyǵynan aıyrylǵan soń jaqyn týystary iri qyzmetterden shettetilgen.

Jemqorlyqqa qarsy is-qımyl agenttigi 13 naýryzda "Qazaqtelekom" AQ qomaqty qarjysyn jymqyrdy jáne qyzmettik ókiletin asyra paıdalandy degen kúdikpen Nursultan Nazarbaevtyń nemere inisi Qaırat Satybaldynyń qamaýǵa alynǵanyn habarlaǵan.



[ad_2]

Derekkóz
Bul maqala týraly ne oılaısyz?