Tiri bolsam, qazaqqa qyzmet etpeı qoımaımyn!

Álıhan Bókeıhan

Bergeıdiń bylyǵy áli shyǵyp jatyr

04 naýryz 2022 121
«Saparbaevtyń syılyǵy» úshin aqtóbelik shendilerdiń basy daýǵa qaldy. Ysyrap bolǵan 161 mln teńge búdjet aqshasyn «Aqtóbe» áleýmettik-kásipkerlik korporasıasy Bergeı Rysqalıevtan óndirip alýǵa bekinip otyr.

Aqtóbede úsh jyl buryn saltanatty túrde ashylǵan «Baspasóz úıi» qaıda? orda.kz saıtynyń jazýynsha, Olımpıada chempıony Jaqsylyq Úshkempirov, ardager jýrnalıser Qaınar Oljaı, marqum Nurtileý Imanǵalı bastaǵan qoǵam qaıratkerleri arnaıy shaqyrtylyp, tusaýkeserin ótkizgen ortalyq qazir joq. Aqtóbe ákimderiniń jumysyn tizip, memlekettik tapsyrysty oryndap otyrǵan osyndaǵy oblystyq eki gazet ujymy qazir «qańǵyp» júr.
«Bul 2018 jyly bolǵan oqıǵa. Saparbaevtyń kezinde «Aqtóbe» ÁKK» AQ-y arqyly jóndeý jasatyp, «Aktúbınskıı vestnık» gazetiniń 100 jyldyǵyna dep bizge syıǵa tartty. «Osynda otyrasyńdar, ári qaraı «Jýrnalıser aleıasyn» ashamyz» dedi. Artynan ol ǵımarat basqa jaqtaǵy  adamdardyki bolyp shyqty. Sottasyp, múlikterin túgendedi.  Bizge «ǵımarat bizdiki, jaldaısyndar» degesin shamamen 2,5 mln teńgege jalǵa alyp otyrdyq. 2021 jyldyń qarasha aıynda hat keldi. «Komýnaldyq qyzmet aqysyn aıyna 5 mln teńgege deıin kóbeıtemiz» delingen. Eseptegende bir jylǵa 60 mln teńge shyǵady eken. Bizde ondaı aqsha qarastyrylmaǵan. Sondyqtan ol ǵımaratty bosatyp, kóship kettim»,- dedi «Aqtóbe Medıa» JSHS-niń dırektory Raýken Otynshın.

Berdibek Saparbaev Aqtóbe oblysynyń ákimi bolyp turǵan tusta Bergeı Rysqalıevtyń úlesi bar «A-Polıgrafıa» ǵımaratyn jergilikti basylymǵa syıǵa tartqan bolyp shyqty. Ákimdik «Aktúbınskıı vestnık» gazetiniń 100 jyldyǵyna oraı ǵımaratty «Baspasóz úıi» dep atap, jabdyqtady. Sonymen qatar jóndeý, qalpyna keltirý jumystary úshin Aqtóbe» ÁKK AQ-y arqyly búdjetten 161 mln teńge jumsady.

Keıin Bas prokýratýrynyń ózi Bergeı Rysqalıevqa tıesili jer telimderi men birneshe seriktestikti sot arqyly qaıtaryp berdi. Eks-shendige tıesili múlikter qatarynda ákimdik syıǵa tartyp jibergen «A-Polıgrafıa» ǵımaraty da bar.  «Ǵımaratty jóndeýge ketken búdjet shyǵynyn kimnen suraımyz?» degen saýalymyzdy oblys ákimdigine joldadyq.

Sotqa shaǵym túsedi


Aqtóbe oblystyq qarjy basqarmasynyń basshysy Nurlybek Ónerbaev sotqa shaǵym túsiriletinin aıtty. «Aqtebe Medıa» ortalyǵy «A-Polıgrafıa» ǵımaratynan jaldaý aqysy qymbattaǵannan keıin shyqqany belgili boldy.
«Shart talaby boıynsha barlyǵy 1575,8 sh.m. ǵımaratty jaldaý quny aıyna 2 083,0 myń teńge bolsa, komýnaldyq shyǵyndarymen qosa alǵanda barlyǵy 27254,0 myń teńgeni qurady. Alaıda, «A-Polıgrafıa» JSHS tarapynan 2022 jyldan bastap aı saıynǵy jaldaý aqysy 4372,0 myń teńgege deıin ósetindigi jóninde eskertpe hat berildi. Iaǵnı, jańa jaldaý aqysy komýnaldyq shyǵyndardy eseptemegende 52464,0 myń teńge bolady. Qarajatty únemdeý úshin ujym basqa ǵımaratqa aýysty. Jóndeý jumystaryna jumsalǵan qarajat «Aqtóbe» ÁKK AQ  tıesili. Ekeýiniń arasynda kelisimshart bar. Qaryz bergen. Qazirgi tańda «Aqtóbe» ÁKK AQ sot oryndaýshylarmen is-sharalar josparlap, «A-Polıgrafıa» múligine, shottaryna aýyrtpalyq salyndy. Aqshany sot arqyly óndirip alady»,- deıdi Nurlybek Ónerbaev.

Eseptesek seriktestik 1575,8 sharshy metrdiń ár sharshy metrin 2083 teńgege jaldaǵan. Bul degenimiz aı saıynǵy shyǵynnyń 3 120 000 teńge ekenin kórsetedi. (1575,8h2083=3 282 391,4tg).

Ázirge Saparbaev syıǵa tartqan «Baspasóz úıi» de, aqsha da joq. Ysyrap bolǵan búdjet aqshasy qaı ýaqytta keri qaıtarylatyny belgisiz.

Ardaq Erýbaeva, Aqtóbe
Bul maqala týraly ne oılaısyz?