Belarýste Reseı men Ýkraına arasynda kelissózdiń ekinshi raýndy aıaqtaldy. Ýkraına prezıdenti keńsesiniń ókili Mıhaıl Podolák "bizge kerek nátıjege qol jetkize almadyq" dedi.
Ol Reseımen gýmanıtarlyq dáliz uıymdastyrý úshin atysty ýaqytsha toqtatý týraly ǵana kelisimge kelgenderin málimdedi.
"Beıbit turǵyndardy evakýasıalaý úshin jáne atys bolyp jatqan jerlerge dári-dármek pen azyq-túlik jetkizý úshin ýaqytsha atysty toqtatýǵa kelisti" dedi Podolák.
Ýkraına taraby kelissózdiń úshinshi raýndy qashan bolatyny belgisiz deıdi.
Osynyń aldynda Reseı prezıdenti Vladımır Pýtın men Fransıa prezıdenti telefonmen sóılesken. Makronnyń resmı ókili bul kezdesý jaıly:
"Fransıa prezıdenti qıyndyqtyń bári alda dep kútedi. Sebebi Pýtınniń aıtqandarynan jylymyq kórmegen. Ol alǵan betinen taımaı otyr. Pýtın álem onyń shartyn qabyldaıdy dep kútedi. Eger onyń shartyn qabyldamasa ol Ýkraınany tolyq basyp alǵansha shabýyldy jalǵastyra bermek" dedi.
Al Kremldiń habarlaýynsha, Pýtın Makronmen telefon arqyly sóıleskende Máskeý maqsatyna jetetinine "senim bildirgen". Buǵan deıin Pýtın Ýkraına "qarýsyzdanyp", beıtarap statýsqa ıe bolýy kerek degen talap qoıǵan edi.
Reseıdiń Ýkraınaǵa basqynshylyq soǵysy jalǵasyp jatyr. Beısenbi, 3 naýryzǵa qaraǵan túni Ýkraınanyń ondaǵan aımaǵynda áýe dabyly qaǵyldy. Kıev, Harkov sekildi birqatar qalaǵa shabýyl jasaldy. Beıbit turǵyndar arasynda qaza tapqandar kóbeıgeni habarlanyp jatyr.
