Clearview AI kompanıasy osyndaı júıe búkil álem boıynsha quqyq qorǵaý jáne memlekettik organdar úshin birińǵaı baqylaý qurýǵa kómektese alady dep sanaıdy.
Degenmen bul bastama IT salasynyń alpaýyttarynyń synyna ushyrap úlgerdi.
Bet-álpetti tanýmen aınalysatyn Clearview AI kompanıasy ınvestorlarǵa bir jyl ishinde derekter bazasynda 100 mıllıard adamnyń bet beınesi bolatynyn aıtty. Bul «álemdegi barlyq adamdy túgel anyqtaýǵa» jetkilikti bolar edi, dep jazady The Washington Post.
Dóreki boljam boıynsha, Jerdiń árbir turǵynyna 14 sýretten keledi. Clearview AI sýretter búkil álem boıynsha quqyq qorǵaý jáne memlekettik organdar úshin baqylaý júıesin qurýǵa kómektese alady dep sanaıdy.
Clearview AI bul jınaqtyń negizgi kózi áleýmettik medıa jáne adamdardyń sýretterin ornalastyratyn ártúrli veb-saıttar bolady dep otyr. Sonymen qatar sýretterdi jınaý adamdardyń kelisiminsiz júzege asyrylatyny atap ótildi.
Buǵan jetekshi IT-alpaýyttary alańdaýshylyq bildirdi. Facebook, Google, Twitter jáne YouTube ruqsatsyz jınaýdy dereý toqtatyp, fotokontentti derekqordan joıýdy talap etti. Jaýap retinde Clearview AI AQSH Konstıtýsıasynyń birinshi túzetýine silteme jasaı otyryp, kompanıa áreketteriniń zańdylyǵyn jarıalady.
Kompanıa Kalıfornıa, Illınoıs, Nú-Iork, Vermont jáne Vırdjınıa shtattaryndaǵy sot prosesterinen zardap shekti. Nú-Djersı shtatynyń bas prokýrory polısıaǵa Clearview AI tehnologıasyn qoldanbaýdy buıyrdy.
Shvesıada bılik ótken jyly jergilikti polısıa bólimine tehnologıany paıdalanǵany úshin aıyppul saldy.
Kompanıa sondaı-aq Kanada, Shvesıa jáne Birikken Koróldiktiń federaldy sotynda toptyq talap-aryzdarmen, sondaı-aq Fransıa, Gresıa, Italıa jáne Ulybrıtanıadaǵy azamattyq qoǵamnyń shaǵymdaryna ushyrady.
Avstralıa men Fransıa úkimetteri Clearview-ge óz azamattarynyń derekterin joıýdy buıyrdy, al Avstralıa kompanıa «aqylǵa qonymsyz» maqsat úshin adamdardyń bet-álpetin jasyryn túrde monetızasıalap jatqanyn aıtty.
Atap ótilgendeı, óz qyzmetin bastaǵaly beri kompanıa klıentteriniń tizimin keńeıtti, onyń ishinde quqyq qorǵaý organdary, ishki qaýipsizdik departamenti, FBR jáne AQSH armıasy da bar.
Derekkóz
