Elimizdegi eń iri bazar sanalatyn "Altyn Orda" bazary memleketke sońǵy 7 jylda 400 mıllıon teńgeden aspaıtyn qarjy aýdarǵan. Bul muhıtqa tamǵan tamshy sekildi deıdi mamandar. Óıtkeni bul óte qarapaıym, jylyna 500 mıllıon teńgege deıin tabysy bar shaǵyn kásiporynnyń tóleıtin salyǵymen para-par eken.
"Altyn Orda" JSHS qańtardyń 26-sy kúni taratylǵan bolatyn. Bul týraly ratel.kz jazdy. Almaty oblysynyń Qarasaı aýdanynda ornalasqan "Altyn Orda" bazarynyń jalpy aýmaǵy — 180 000 sharshy metr. Alaıda kúnine myńdaǵan adam saýda jasaıtyn alyp bazardyń memleketke tólegen salyǵy kúmán týdyrady. Sońǵy 7 jylda "Altyn Ordaǵa" ıelik etetin eki kásiporyn búdjetke 400 mıllıon teńgege jýyq qarjy aýdarypty.
Qarasaı aýdany boıynsha Memlekettik kirister basqarmasynyń málimetinshe, bul nysanǵa Bolat Nazarbaevtyń tikeleı qatysy bar. "Altyn Orda Qaz Trade Ltd" JSHS-ine Elbasynyń inisi 2014 jyldan 2021 jylǵa deıin ıelik etken. Alaıda Almatydaǵy qańtar oqıǵasy kezinde seriktestiktiń qojaıyny ózgerdi.
