Taldyqorǵanda Nursultan Nazarbaevtyń eskertkishin qulatqan jigitke qatysty is qozǵalyp jatyr. Kóppen birge oqıǵaǵa qatysqan jigit aýrýhanaǵa aýyr halde jetkizilgen.
Almaty oblysyndaǵy narazylyq kezinde eskertkishti qulatqan jigit isti boldy, dep habarlaıdy alash.press
Qańtar aıynyń basynda elimiz boıynsha halyqtyń jappaı narazylyǵy bastalǵan ýaqytta Almaty oblysynda Nursultan Nazarbaevqa ornatylǵan eskertkishti kópshilik qulatyp tastaǵan edi. Oqıǵaǵa qatysýshylar aýyr júk kóligimen eskertkishti tartyp, sońynan ekige bólip tastaǵan. Onyń beınejazbasy áleýmettik jelide tarap, keńinen talqylǵa tústi. Alaıda oǵan qatysty jergilikti atqarýshy bılik tarapynan eshqandaı málimdeme jasalǵan joq.
Qaraly oqıǵadan keıin arada úsh apta ótkende Almaty oblysynda qoǵam belsendisi Erjan Terlikbaev qazir jastarǵa is qozǵalyp jatqanyn málimdedi. Onyń aıtýynsha, eskertkishti qulatqan jigitke qatysty is bastalyp ketken.
"Qańtar aıynda bolǵan oqıǵa boıynsha belsendi aýyl jastaryn qýdalap, uryp-soǵyp, qatty ábirgerge salyp jatyr. Qazirgi ýaqytta 17 balany polısıa ustap áketti. Olar áli sonda jatyr. Qashyp júrgenderi de bar. Shash al dese bas alatyndar aýyldyń berekesin alyp biti. Sol 17 adamnyń ishinde qatty soqqydan aýrýhanaǵa túskender bar. Qapal aýylynda Batyrbaı Qılybaev degen azamattyń uly Azamat burynǵy Tuńǵysh Prezıdent Nazarbaevtyń eskertkishin qulatqan kezde júk kóligin júrgizgen. Polısıa qatty urǵannan qazir onyń bir búıregi istemeı qalǵan. Azamattyń qazirgi jaǵdaıy óte aýyr, aýrýhanada jatyr. Ákesin karantın degen syltaýmen balasyn kórýge kirgizbeı otyr", — dedi Erjan Terlikbaev.
Ol Azamat Qılybaevpen qatar Qyzylaǵash aýylynyń da kóptegen jastary qamaýda jatqanyn jetkizdi.
"Oblysta ustalǵan, aýrýhanaǵa túsken balasyn kóre almaı otyrǵandar kóp. Oqıǵa kezinde Qapaldyń bir balasy oq tıip, aýrýhanaǵa tústi. Bul jigitterdiń árqaısysy bir-bir úıdiń asyraýshylary. Qazir olardy otbasylary kútip otyr, maldary qaraýsyz tur. Qańtardyń basyndaǵy qaraly oqıǵanyń zardabyn halyq kórip otyr", — deıdi Erjan Terlikbaev.
Qańtar aıynyń basynda halyq narazylyǵynan keıin 819 qylmystyq is qozǵalǵan. Sonymen birge, Taldyqorǵan qalasynda bir otbasy múshelerin komendattyq saǵat kezinde kólikte atyp tastaǵany týraly da habarlandy.
