“Qazir el ishinde túrli jaǵymsyz áńgimeler tarap jatqanyn bilemin. Osyǵan baılanysty Memleket basshysy retinde taǵy da qaıtalap aıtamyn. Tuńǵysh Prezıdentimiz elimizdi irgesi berik memleketke aınaldyrý úshin zor eńbek sińirdi. Kemshilik jibergen kezi bolsa, onyń eldiń keıingi basshylary tarazyǵa tartatyn bolady”, – dedi Q. Toqaev.
Onyń atap ótkenindeı AQSH, Sıngapýr, Qytaı sekildi irgeli memleketter kósemderiniń el basqarǵan jyldaǵy jetistikterin kemshiliginen joǵary qoıa bilgen.
“Jańylmaıtyn jaq, súrinbeıtin tuıaq joq! Jumys istemeı, qol qýsyryp otyrǵan adam ǵana qatelespeıdi. Amerıka prezıdentteri de, Qytaı kósemderi de qatelesken. Olar da kóp kemshilik jiberdi. Tipti eldiń bári jaqtap, maqtap sóıleıtin Sıngapýr kóshbasshysy Lı Kýan Iý-da qatelik jibergen”, – dedi Toqaev.
Onyń pikirinshe Qazaqstan halqy Tuńǵysh prezıdenttiń tarıhı rólin umytpaýy kerek. Onyń qaıratkerlik qabiletine ádil baǵa berilýi tıis. Ótkenin qaralaıtyn halyq, bolashaqtyń qadirin bilmeıdi.
“Ótken zamandy joqqa shyǵaratyn, óz basshylaryna shabýyl jasaıtyn halyqtyń bolashaǵy ekitalaı ári bulyńǵyr”, – dedi Prezıdent.
Ol sonymen qatar Nazarbaevtyń ıadrolyq qarýsyzdaný baǵytynda úlken is atqaryp, álemdik qaýymdastyq tarapynan abyroı-bedelge ıe bolǵanyn atap ótti. Ótken 30 jylda Qazaqstan Orta Azıa elderinen ozyp, aımaqtyń kóshbasshysy atanǵan.
Toqaev sondaı-aq el astanasyna qatysty pikir bildirip, onyń Saryarqa tórine ornalasýy geosaıası turǵyda kóregen sheshim bolǵanyn atap ótti.
“90-shy jyldary Qazaqstanǵa qastyq oılaǵan keıbir sarapshylar bizdiń eldi kóp uzamaı tarap tynady degen boljam aıtty. Nursultan Nazarbaev sol bir aýmaly-tókpeli shaqta memlekettiń qabyrǵasyn qalaýdy moınyna aldy”, – dedi Toqaev.
Onyń atap ótkenindeı 90-shy jyldardyń ortasynda bastalǵan shekarany shegendeý jumysy oıdaǵydaı oryndalǵan. Strategıalyq mánge ıe osy bir jetistiktiń arqasynda Qazaqstan memleket retinde ósip-óne bastaǵan.
Sondaı-aq memleket basshysy eldi aýyz birlikke shaqyrdy.
“Biz buǵan deıingi jetistikterimizden aıyrylyp qalmaýymyz kerek. Memleketimizdi nyǵaıtyp, kez-kelgen synaqqa daıyn bolýymyz qajet. Tabysqa jetý úshin, eń aldymen, aýyzbirshilik kerek ekenin este ustaıyq”, – dedi Memleket basshysy.
