Ákim páter kiltterin tabystaǵanda aryndaı sóılep, búı degen: «Halyqty turǵyn úımen qamtamasyz etý – memlekettik saıasattyń basym baǵyttarynyń biri. Prezıdent turǵyndarǵa baspana qoljetimdi bolýy kerek dep atap ótti. Jyl sońyna deıin oblys ortalyǵynda 22 kópqabatty úı tapsyrylyp, 2 myńnan asa otbasy jańa qonysqa ıe bolady».
Biraq ákim tabystaǵan komýnaldyq úıler áli kúnge deıin bos tur. Óıtkeni turǵyndar óz páterlerine ózderi kire almaı áýre-sarsańǵa túsip júr.
«Qarasha aıynda turǵyn úı-kommýnaldyq sharýashylyǵy bóliminen habarlasyp, jetpeı turǵan qujattardy túgendeýdi, anyqtamalardy ákelýdi suraǵan. Onyń ishinde balalardyń týýy týraly, neke qıý nemese ajyrasý týraly qujattar bar. Biz suraǵannyń bárin tez arada jınap berdik. Sodan keıin kezegimizdi bildik. Men № 10 bolyp turdym, maǵan sen alyp úlgeresiń, birinshi úıden páter beriledi dep sendirdi. Habardy kút dedi. Jańa jylǵa deıin baspananyń beriletindigin aıtty. Tipti arnaıy chat quryp, oǵan bizdiń sanatqa jatatyn 88 adamdy qosty. Biraq sodan beri tym-tyrys, bir habar joq», — deıdi «QazAqparat» agenttigine túsinikteme bergen Oksana TYTENOK.
Ákim kelgende turǵyndardy páterlerine kirgizip, ákim ketken soń olardy qaıtadan qýyp shyqqan syńaıly.
Bul týraly jergilikti turǵyn Natalá SENCHINA bylaı deıdi:
«Tolyq emes otbasy» retinde páter kezeginde turdym. Sol kúni bizge páter kiltin berdi, ishin kirip kórdik, sodan keıin bizdi shyǵaryp, esigin qaıta qulyptap qoıdy. Nelikten áli kúnge deıin páterimizge kire almaı otyrǵanymyzdy túsinbeımin, naqty sebebin eshkim aıtpaıdy. Birese kelisimshart joq deıdi, endi birde komısıa qabyldamady dep aıtty. Páterlerde jaryq ta, jylý da bar, gazdy da qosýy tıis edi. Ákimdiktegiler jaryqty ýaqytsha berdi" deıdi.
Jetim retinde tirkelip, eki bólmeli páter alamyz dep úmittengen jandar da aldanyp qalǵanyn bilip, san soǵyp otyr.
«Kezekte 18-bolyp turdym. Balam ekeýimizge 18 sharshy metrlik bir bólmeli páterdiń kiltin saltanatty túrde tabystady. Aldynda eki bólmeli beremiz degen. Keıin ákimdiktiń 217-kabınetine baryp bildim, qujattary joq, sondyqtan ázirge qonystana almaısyńdar dep aıtty», — dep muńaıady Áıgerim SHÝQANOVA.
Jalǵa beriletin 6 komýnaldyq úıde 600 páter bar. Onyń 120-sy «jetim jáne ata-ana qamqorlyǵynsyz qalǵandar» sanatyna jatatyndarǵa berilýi tıis bolǵan.
Oblystyń eks-ákimi Aıdarbek SAPAROVTAN «muraǵa» qalǵan bul úıler jospar boıynsha osydan úsh jyl buryn paıdalanýǵa berilýi kerek edi. Alaıda jaýapsyz merdigerlerdiń kesirinen áli kúnge deıin qańyrap tur.
Qala ákimdiginiń baspasóz qyzmetiniń habarlaýynsha, qazirgi ýaqytta qonystanýshylardyń tizimderi naqtylanyp jatyr. Ákimdiktegilerge tizimdi anyqtaý qıynǵa soǵyp jatqan kórinedi. Páter kezeginde turǵandardy tabý qıyn-mys.
Petropavl qalasynyń ákimdigi kezekte turǵandardyń tizimin jańartyp jatqandyǵy qarasha aıynda belgili boldy. Sybaılas jemqorlyqqa qarsy qyzmet pen prokýratýra oblys ortalyǵynda turǵyn úıdi bólý kezinde kóptegen zań buzýshylyqtardy tapqan.
Qala ákiminiń orynbasary Qalıa TÚRENOVA muny TKSH bóliminde kadrlardyń jıi aýysýmen túsindirdi. Onyń aıtýynsha, tizimderdi naqtylaıtyn arnaıy túgendeý toby da qurylǵan.
Ótken jyly Sybaılas jemqorlyqqa qarsy qyzmet bul sanatqa turǵyn úıdiń memlekettik qordan zańǵa sáıkes 20% úlesiniń ornyna nebári 11% ǵana alǵanyn anyqtady.
Vedomstvo jetim balalardy baspanaǵa muqtajdar tiziminen sebepterin kórsetpeı alyp tastaǵan. Osyndaı 1 360 deregi anyqtalypty.
Tipti 2021 jyly páterdi tórt jyldan astam kútken Petropavl turǵyny, jetim Aleksandr RÁBÝHA ony qaıtys bolǵan adam retinde kezekten shyǵarǵanyn kezdeısoq bilgen. Qala ákimdigi muny tehnıkalyq aqaýlyqpen túsindirdi.
Qazirgi ýaqytta memlekettik turǵyn úı qorynan turǵyn úı alý kezektiligi týraly aqparatqa sáıkes Petropavl boıynsha kezekte «jetim jáne ata-anasynyń qamqorlyǵynsyz qalǵan balalar» sanatyna kiretin 1 817 adam tur.
Qysqasy, qurylysy bitken úıler tur, olardyń qaǵaz júzindegi ıeleri de belgili, biraq olar jergilikti olaq shendilerdiń kesirinen páterlerine qol jetkize almaı júr.
Ǵaýez Nurmuhambetov ótken jyly qyrkúıekte ǵana SQO ákimi bolyp taǵaıyndaldy. Biraq bul ony jaýapkershilikten qutqarmaıdy. Páter kiltterin saltanatty túrde tabystadyń ba – páterlerdi ıelerine ber. Kózboıaýshylyq jasap, halyqty sendeltip qoıýdyń ne qajeti bar?
Álde Ǵ.Nurmuhambetov «qaǵaz úıler» taratýdy buǵan deıin qyzmet etken jeri – Qostanaı oblysy ákimdiginen úırenip kelgen be?..
