Tiri bolsam, qazaqqa qyzmet etpeı qoımaımyn!

Álıhan Bókeıhan

«Biz – terrorıst emespiz». Qańtar qurbandarynyń jaqyndary alańǵa jınaldy

05 qańtar 2024 56
Búgin qańtar oqıǵasyna 2 jyl toldy. Almatyda respýblıka alańyna jınalǵan azamattar Qańtar oqıǵasynyń qurbandaryna arnap quran baǵyshtady.

Marqumdardyń týystary kimniń qolynan qaza tapqanyn anyqtaýdy talap etti.

Alańǵa eki jyl burynǵy qandy oqıǵa kezinde qaza bolǵandardyń týǵan-týystary men azaptalǵan azamattar da keldi.

Qańtar oqıǵasy osydan eki jyl buryn bastalyp, jappaı narazylyq birneshe qalany sharpyp, 238 adamnyń ólimimen aıaqtalǵan.

Onyń ishinde 19 marqum kúsh qurylymdarynyń qyzmetkerleri. Keıin adam quqyqtary jónindegi ýákil bolǵan Elmıra Ázimova tergeý barysynda azaptaýdan taǵy alty adam kóz jumǵanyn habarlaǵan edi.

Qańtar oqıǵasynan keıin myńnan asa adam ustalyp, olardyń kóbi prezıdent raqymshylyǵymen bostandyqqa shyqqan. Kárim Másimov, Murat Bektanov bastaǵan birneshe sheneýnikke úkim de shyǵyp qoıǵan. Qaırat Qudaıbergen, Arman Jumageldıev boıynsha sot isteri áli aıaqtalǵan joq.

Búgin Almatydaǵy alańǵa jınalǵan azamattar qandy oqıǵa kezinde opat bolǵan azamattardyń esimi jazylǵan plakat alyp shyqty. Qurban bolǵandardyń týǵan-týystary áli de tergeýdiń júrgizilýin, týystary kimniń qolynan qaza tapqanyn anyqtaýdy talap etti.

Jıynǵa belgili qoǵam belsendisi, jýrnalıs Rysbek Sársenbaı, Qańtar oqıǵasy kezinde aýyr jaraqat alǵan Ermek Ábdireshov sóz sóıledi.

Rysbek Sársenbaı «Dýman Muhammedkárim, Áıgerim Tileýjan, Marat Jylanbaev, Qalas Nurpeıisov pen basqa da belsendiler Qańtar aqıqatyn, óz pikirin aıtqany úshin qamaýda otyrǵanyn» aıtyp, olarǵa bostandyq berýdi talap etýge shaqyrdy. Alańǵa jınalǵan azamattar «Biz – terrorıst emespiz» dep urandatty.

Foto qaz365.kz
Bul maqala týraly ne oılaısyz?