Almaty qalasynda "DAULETTEN qaıyrymdylyq qory" uıymdastyrǵan qaıyrymdylyq keshte Dımash Qudaıbergenniń kostúmi aýksıonda 2 000 000 teńgege satyldy. Bul týraly "Dauletten" qaıyrymdylyq qorynyń baspasóz qyzmeti habarlady.
Atalmysh kostúmdi tanymal ánshi Alla Pýgachevanyń Máskeýde ótken mereıtoıyna oraı uıymdastyrylǵan "Podarok dlá Anny" atty shyǵarmashylyq keshinde kıgen. Onda Dımash Igor Krýtoıdyń "Lúbov, pohojaıa na son" ánin oryndady. Kostúm dızaıneri – Atelier Leka.
Qaıyrymdylyq qory tarapynan uıymdastyrylǵan aýksıonda alǵashqy lottyń baǵasy 500 000 teńgeden bastaldy. Aýksıon sońynda kostúm 2 000 000 teńgege satyldy. Bul lotty qazaqstandyq kásipker, qarjylyq saýattylyq boıynsha mentor Erkebulan Áripbaı satyp aldy.
"Men bul kostúmdi inime syılaımyn. Ol 11-synypty aıaqtaıyn dep jatyr. Ózi de Dımash Qudaıbergenge uqsaıdy. Týystarymyzdyń bári ony Dımashqa uqsatady", - dedi ol.
Bul atalmysh keshte 2 000 000 teńgege baǵalanǵan eń úlken lot boldy. Sondaı-aq, qaıyrymdylyq keshinde "GGG fýtbolka" 1 000 000 teńgege, qazaqstandyq mını-fýtbolıst, Qaırat jáne Qazaqstan quramasynyń shabýylshysy Serik Jamanqulov kıgen fýtbolka 300 000 teńgege, "Ordabasy" fýtbol klýbynyń jáne Qazaqstan Ulttyq quramasynyń kapıtany Ashat Taǵybergenniń fýtbolkasy 300 000 teńgege satyldy. Aýksıonda Mustafa Óztúriktiń qoly qoıylǵan kitap ta boldy.
Aıta ketý kerek, "Dauletten qory" tarapynan uıymdastyrylǵan bul keshte jıyny 7 000 000 teńge jınaldy. Aýksıonnan jınalǵan qarajat qaıyrymdylyqqa jumsalmaq. Elimizde bolyp jatqan sý tasqyny saldarynan zardap shekken óńirlerge gýmanıtarlyq kómek kórsetiledi.
