Qazaqstandaǵy baspalar arasynda monopolıske aınalǵan «Dáýir» baspasy qamaýdaǵy Qaırat Satybaldynyń anasy Svetlana Nazarbaevaǵa tıesili.
Memlekettik satyp alý portalyndaǵy aqparatqa súıensek, baspa aqpannan beri bir kózden satyp alý ádisi arqyly birneshe tapsyrys alyp keledi.
Máselen, bıyl aqpanda «Alatau Akparat» JSHS-men jalpy quny 12 mln teńgeden asatyn eki kelisimshart jasasqan.
Eks-prezıdenttiń nemere inisi Qaırat Satybaldy ustaldy degen aqparat BAQ betterinde týra bir aıdan soń 13 naýryz kúni jarıa boldy. Ol «Qazaqtelekom» AQ qomaqty qarjysyn jymqyrdy jáne qyzmettik ókiletin asyra paıdalandy degen kúdikke ilingen. Tergeý 24 tamyz kúni aıaqtaldy.
Anasy Svetlana Nazarbaevaǵa tıesili «Dáýir» baspasy Qaırat Satybaldy tergeýde jatqan kezde de, ıaǵnı naýryzdyń 31-i kúni quny 61 mln teńge bolatyn taǵy bir tapsyrys alǵan.
Tapsyrys berýshi – «Alatau Akparat» JSHS. Dál osy kompanıamen 5 mamyr kúni kelisimshartty taǵy jalǵastyrǵan. Bul kelisimshart quny – 53 mln teńgege jýyq.
Tehnıkalyq sıpattamasynda baspanyń «Vechernıı Almaty» jáne «Almaty aqshamy» gazetterin basyp shyǵarý úshin gazet qaǵazyn jetkizýge jáne qoımadan Almatyda ornalasqan baspahanaǵa jetkizý kerek dep kórsetilgen.
«Dáýir» baspasy maýsym aıynda Mádenıet jáne sport mınıstrliginiń tapsyrysymen taǵy birneshe lottyń jeńimpazy atanǵan.
Qoǵamdyq mańyzy bar ádebıetti basyp shyǵarý jáne taratý boıynsha qyzmet kórsetýge jasalǵan úsh kelisimsharttyń jalpy quny – 48 mln 810 myń teńge bolady.
Tehsıpattamasynda kórsetilgendeı, baspa barlyǵy 8 qalamgerdiń kitabyn basyp shyǵarý jáne kitaphanalarǵa taratý qyzmetin iske asyrady.
Al shilde aıynda baspa men mınıstrlik taǵy birneshe tapsyrysty oryndaýǵa kelisimshart qurǵan. 4 kelisimsharttyń jalpy quny – 111 mln teńgeden asady.
Munda da qoǵamdyq mańyzy bar ádebıetti basyp shyǵarý jáne taratý boıynsha barlyǵy 33 qalamgerdiń kitabyn basyp shyǵarady.
Osylaısha Qaırat Satybaldynyń ózi qamaýda otyrǵanymen, otbasynyń júrip-turýyna ketetin shyǵynyn memlekettik tapsyrystar arqyly óndirip otyrǵan.
Forbes jýrnaly 2018 jyly Qaırat Satybaldyny Qazaqstandaǵy eń yqpaldy 50 kásipkerdiń qataryna jatqyzǵan. Jýrnal sol jyly onyń baılyǵyn 163 mln dollarǵa baǵalaǵan. Búginde tergeý barysynda jalpy somasy 240 mıllıard teńgeden nemese 500 mıllıon AQSH dollarynan asatyn zańsyz satyp alynǵan aktıvteri men aqshasy memleketke qaıtaryldy.
Sybaılas jemqorlyqqa qarsy qyzmet aıyptalýshylardyń basqa da zańsyz aktıvterin izdeý jalǵasyp jatqanyn málimdedi.
Aıta ketelik, 2003 jyly qurylǵan «Dáýir Servıs» JSHS-na da Svetlana Nazarbaeva ıelik etedi. Bul kompanıa da eldegi eń iri gazet – «Egemen Qazaqstan» respýblıkalyq gazeti» JSHS-dan jyl saıyn mıllıardtap tender alyp keledi.
Taraptar arasyndaǵy sońǵy kelisimshart bıyl naýryzda jasaldy. Quny – 1 mlrd 107 mln teńge. Kelisimsharttyń tehnıkalyq sıpattamasyna qaraǵanda, «Dáýir Servıs» JSHS bir jyl boıy Qazaqstannyń 12 qalasyna gazet qaǵazyn jetkizip berip otyrýǵa tıis.
Halyq Uni esebinshe, bıyldyń ózinde qańtar-tamyz aralyǵynda Svetlana Nazarbaevaǵa qarasty qos kompanıa jalpy quny 1 392 810 000 teńgeniń memlekettik tapsyrysyn alǵan.
