Физиология бойынша Нобель сыйлығы гендерді басқарудың жаңа жолын ашқаны үшін берілді деп хабарлайды Alash.kz .
Физиология бойынша Нобель сыйлығы америкалық ғалымдар Виктор Амброс пен Гэри Рувкунға микроРНҚ деп аталатын шағын молекулаларды және олардың гендерді бақылаудағы рөлін ашқаны үшін берілді.
Виктор Амброс пен Гэри Рувкун жасушалардың әртүрлі типтерінің қалай дамитынын зерттеді. Олар микроРНҚ-ны тапты – бұл гендердің жұмысын реттейтін өте кішкентай РНҚ молекулалары.
"Олардың ашқан жаңалығы гендерді басқарудың мүлдем жаңа жолын көрсетті, ол көпжасушалы ағзалар, соның ішінде адамдар үшін де маңызды болды. Қазір адамның геномында мыңнан астам микроРНҚ бар екені белгілі. Бұл жаңалық гендерді бақылаудың жаңа қырын көрсетті. МикроРНҚ ағзалардың дамуы мен жұмыс істеуі үшін маңызды", – делінген хабарламада.
Биылғы Нобель сыйлығы жасушалардағы гендердің жұмысын басқаруға арналған маңызды механизмді ашуға бағытталған. Генетикалық ақпарат ДНҚ-дан ақпараттық РНҚ-ға (мРНҚ) көшіріледі, содан кейін ол жасушаларда ақуыздар өндіруге көмектесетін механизмдерге беріледі.
