ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

جەڭىس – كۇشتىلەرگە بۇيىردى

27 قىركۇيەك 2022 56
اعىمداعى جىلدىڭ 20-23 قىركۇيەگىندە تمد-عا مۇشە مەملەكەتتەردىڭ شەكارا ۆەدومستۆولارىنىڭ اراسىندا قويان-قولتىق ۇرىسىنان وتكەن حالىقارالىق سايىس تارتىستى بولعانىن ايتۋىمىز كەرەك. تمد شەكارا اسكەرلەرى قولباسشىلارى كەڭەسىنىڭ كۋبوگى ساراپقا سالىنعان چەمپيوناتقا قازاقستان رەسپۋبليكاسى، رەسەي فەدەراسياسى جانە تاجىكستان رەسپۋبليكاسىنىڭ قۇراما كوماندالارى قاتىسىپ، كۇش سىناستى.



ۇقك شەكارا اكادەمياسىنىڭ كەڭ سارايداي سپورت زالىندا وتكەن حالىقارالىق سايىس ءبىرىنشى كۇننەن-اق جانكۇيەرلەردىڭ دەلەبەسىن قوزدىرىپ اكەتكەن. دەگەنمەن، اڭگىمەنى باسىنان باستايىق. قۇرىلعانىنا ۇستىمىزدەگى جىلى تۋرا 30 جىل تولعان تمد-عا مۇشە ەلدەردىڭ شاقك ۇيىمداستىرعان دودا شەكاراشىلار اكادەمياسىنىڭ اسكەري وركەسترى باستاعان ونەرپازدار ۇجىمى دايىنداعان شاعىن كونسەرتتىك باعدارلامامەن اشىلدى. وسىلايشا، كۇش سىناسۋ ءۇشىن شيىرشىق اتىپ تۇرعان سايىپقىراندار الدىمەن ءان تىڭداپ، رۋحاني كۇش العان سوڭ بىرنەشە كەزەڭنەن تۇراتىن سايىستىڭ وزىنە دە كەزەك بەرىلگەن.



سول-اق ەكەن، سايىن دالانىڭ توسىندە ەركىن كوسىلە شاپقان سايگۇلىككە اينالىپ شىعا كەلگەن سپورتشىلاردىڭ اراسىندا بايگەگە بەرگىسىز تايتالاس باستالعان. جوق، شۋ دەگەندە، قازاقستاندىق قۇراما كوماندانىڭ مىقتىلىعى، جەڭىستى قولدان بەرمەيتىندەرى ءبىلىنىپ قالعان...

ءوزى دە اياعىنا دەيىن سولاي بولدى. سوندىقتان، توپتىڭ قۇرامىنا ەنىپ، ءوز ەلىنىڭ نامىسىن قورعاۋ ءۇشىن ايانىپ قالماعان ءار سپورتشىنىڭ اتىن اتاپ، ءتۇسىن تۇستەپ جاتپايىق. حالىقارالىق دەڭگەيدەگى تورەشىلەر قازىلىق ەتكەن سايىستىڭ قالاي وتكەنىنە كوبىرەك توقتالعاندى ءجون كورىپ وتىرمىز.

...الدىمەن شارشى الاڭعا 60 كەلى سالماقتاعى سپورتشىلار شاقىرىلدى. قازاقستان رەسپۋبليكاسى مەن تاجىكستان رەسپۋبليكاسىنىڭ قوس سايىسكەرىنە بەرىلگەن ۋاقىت – 5 مينۋت. وسى ۋاقىتتىڭ ىشىندە ءبىرى ەكىنشىسىنىڭ تىزەسىن بۇگىپ، جەڭىسكە جەتۋگە ءتيىس. جەتتى. قازاقستاندىق ءوزىنىڭ قارسىلاسىن 12-2 دەگەن ەسەپپەن ويسىراتا جەڭىپ، جانكۇيەرلەردىڭ «ۋرالاعان» داۋىسى ايعا جەتكەندەي بولدى...

ورتاعا ەكىنشى بولىپ شىققان 75 كەلى سالماقتاعى وتانداسىمىزدىڭ قارسىلاسى رەسەيلىك تە جەڭىلىپ قانا قويعان جوق. قويان-قولتىق ۇرىسىنىڭ شەبەرىنەن العان سۇراپىل سوققىدان كەيىن كوپكە دەيىن ەسىن جيناي الماي جاتتى.

ورتاعا شىققان 85 كەلى سالماقتاعى سايىسكەرلەردىڭ شايقاسى دا قازاقستاندىق قۇراما كومانداسىنىڭ پايداسىنا شەشىلدى. ءتىپتى، تاجىك شەكاراشىلارىنىڭ نامىسىن قورعاۋ ءۇشىن الىستان ات ارىلتىپ جەتكەن سپورتشىلاردىڭ ءبىرى اينالدىرعان 30 سەكۋندتىڭ ىشىندە نوكاۋت الىپ، كىلەمنىڭ ۇستىندە سۇلاپ جاتتى... ەسەپ 4-0: جەڭىس قازاقستاندىق سپورتشىنىڭ قانجىعاسىنا بايلاندى.

تاجىك رەسپۋبليكاسىنىڭ 90 كەلى سالماقتاعى سپورتشىسىن 10-0 ەسەپپەن جەرلەسىمىز جەڭىپ كەتكەنى دە جانكۇيەرلەرگە ولشەۋسىز قۋانىش سىيلاعانى انىق.

رەسەي فەدەراسياسى مەن تاجىكستان رەسپۋبليكاسىنىڭ اتىنان شىققان كوماندا مۇشەلەرىنىڭ تايتالاسى دا  1 مينۋت 11 سەكۋنتقا سوزىلىپ، جەڭىس رەسەيلىككە بۇيىردى.

ءسويتىپ، قارا شاڭىراق قازاقستاندىق سايىپقىراندارعا كۇش بەرگەندەي، ءبىزدىڭ قۇراما كوماندا سايىستىڭ العاشقى كۇنىن جەڭىسپەن اياقتادى.

... ەكىنشى كۇن دە تاعى ءبىر نوكاۋتپەن «ەستە» قالاتىن سەكىلدى. قويان-قولتىق ۇرىسىنىڭ تالابى دا سول ەمەس پە، ءدال تيگەن سوققى رەسەيلىكتى قارسىلاسىنىڭ الدىندا تىزە بۇكتىردى...

مىنە، وسىنداي سوققىلاردىڭ اراسىندا كەيبىر سپورتشىلارعا مەديسينا قىزمەتكەرىنىڭ كومەگىنە جۇگىنۋگە تۋرا كەلەدى. لايىقتى باعاسىن بەرۋ كەرەك، ۇقك شەكارا اكادەمياسى اسكەري-مەديسينالىق ءبولىمىنىڭ دارىگەرى مەديسينا قىزمەتىنىڭ اعا لەيتەنانتى رۋسلان نارىنوۆ جاراقات الۋشىلارعا شۇعىل ءارى ساپالى العاشقى مەديسينالىق كومەك كورسەتىپ ۇلگەرىپ جاتتى.

چەمپيونات تا اياقتالىپ، كوماندالاردىڭ جيناعان ۇپايلارىن ەسەپتەيتىن ماڭىزدى ءسات تۋدى. سوندىقتان، بەرىلگەن ءۇزىلىستى پايدالانىپ، ءبىز بۇگىنگى الاماننىڭ باس تورەشىسى ق ر ۇقك جاۋىنگەرلىك دايىندىق باسقارماسىنىڭ باستىعى ۇ.ق. پولكوۆنيگى ا.كەنجەبايەۆتى سوزگە تارتقان ەدىك.

– حالىقارالىق دەڭگەيدەگى سايىستى وتە تارتىستى ءوتتى دەپ ايتا الامىن، - دەيدى ارمان قارجاۋباي ۇلى. قاتىسۋشىلاردىڭ بارلىعى دەرلىك «حالىقارالىق سپورت شەبەرى» «سپورت شەبەرى»، «سپورت شەبەرلىگىنە ۇمىتكەرلەر». سوندىقتان، رەسەي، تاجىكستاننان كىل مىقتىلار عانا كەلگەنىن  بىلۋگە بولادى. ايتسە دە، مەن قازاقستان رەسپۋبليكاسىنىڭ شەكاراشىلارى اتىنان شىققان سپورتشىلاردىڭ ونەرىنە ءتانتى بولعانىمدى جاسىرمايمىن. ءبىزدىڭ قۇراما كوماندانىڭ بىردە-بىر مۇشەسى جەڭىلىس تاپقان جوق. كەرىسىنشە، قارسىلاستارىن ويسىراتا جەڭىپ وتىردى.

...اقىرى ءۇزىلىس اياقتالىپ، جەڭىمپازداردى ماراپاتتاۋعا كەزەك بەرىلدى. ەلىمىزدىڭ نامىسىن قورعاعان مايتالماندار: س.ەسەنگەلدين، م.جۇماعۇلوۆ، ا.شەربايەۆ، ب.بەكتەمىسوۆ، ق.ۇمبەتقۇلوۆ، ر.ءمادي، ب.دەمەي، ب.جۇبانىشتار تمد شاقك ءتوراعاسىنىڭ گراموتاسىمەن جانە باعالى سىيلىقتارىمەن ماراپاتتالدى. ورىن العان كوماندا مۇشەلەرىنە تمد شاقك ءتوراعاسىنىڭ ورىنباسارى گەنەرال-لەيتەنانت ا.بۋەروۆ باستاعان مارتەبەلى قوناقتار سالتاناتتى جاعدايدا تابىس ەتتى.

ءسويتىپ، ءى-ورىندى قازاقستان رەسپۋبليكاسىنىڭ قۇراما كومانداسى جەڭىپ الدى. جۇلدەلى ەكىنشى ورىنعا رەسەي فەدەراسياسىنىڭ سپورت كومانداسى كوتەرىلسە، ءۇشىنشى ورىن – تاجىكستان رەسپۋبليكاسىنىڭ قۇراما كومانداسىنا بۇيىردى.

شارشى الاڭنىڭ «شاڭىن» قاققان جەڭىمپازداردى جەڭىستەرىمەن قۇتتىقتايمىز!

جۋرناليست ت.داۋلەتبايەۆا، «OS-چر».

سۋرەتتەردى تۇسىرگەن ج.جابىربەكوۆ.

شقا باسپا ءسوز حاتشىسى.  

 

 

 

 

 

 

 
بۇل ماقالا تۋرالى نە ويلايسىز؟