ەلىمىزدىڭ 4 وڭىرىندەگى 8 ۋنيۆەرسيتەت پەن 1 كوللەدجدەن 16 ستۋدەنت قاتىسىپ، 2 ءبولىم 4 كەزەڭ بويىنشا ءسوز دوداسىنا ءتۇستى. جۇپتار اراسىندا وتكەن جەكپە-جەك تۇرىندەگى شەشەندىك سايىس قاتىسۋشىلاردىڭ كوركەمدىك دەڭگەيى مەن ءبىلىمىن، وي ۇشقىرلىعى مەن سوزدىك قورىن، ءتىل تازالىعى مەن سۇراق قويۋ قابىلەتىن سىننان وتكىزدى. قالعان ەكى بولىمدە شەشەندىك سوزدەر مەن تولعاۋلاردى جاتقا ءبىلۋ، جۇمباقتاپ، استارلاپ ايتىلعان ويدىڭ ءتۇيىنىن شەشىپ، ءمانىن ءتۇسىنۋ دەڭگەيى انىقتالدى. قازىلار مەن قاتىسۋشىلار بال بويىنشا جەڭىمپازدار بەلگىلى بولعان سوڭ عانا حابارلاندى. وسىلايشا حاكىم ابايدىڭ: "كىسىگە قاراپ ءسوز الما، سوزىنە قاراپ كىسىنى ال" قاعيداسىنا ساي بارىنشا ءادىل باعا بەرىلدى. بايقاۋ قورىتىندىسى مىناداي بولدى:
باس جۇلدەنى(150 000تگ) الماتى مەملەكەتتىك سەرۆيس جانە تەحنولوگيا كوللەدجىنىڭ ستۋدەنتى رامازان نۇرلان ۇلى جەڭىپ الدى. جۇلدەلى 1-ورىنعا(100 000تگ) ءال-فارابي اتىنداعى قازۇۋ-دىڭ 1-كۋرس ستۋدەنتى داۋلەتبەك دۋمان لايىق بولسا، 2-ورىنداردى ءى.جانسۇگىروۆ اتىنداعى جەتىسۋ ۋنيۆەرسيتەتىنىڭ ستۋدەنتى تالشىن تالعات قىزى(70 000تگ) مەن م.قوزىبايەۆ اتىنداعى سولتۇستىك قازاقستان ۋنيۆەرسيتەتىنىڭ ستۋدەنتى قاليحانوۆا گۇلاي قانجىعالادى.
3-ورىن(50 000تگ) يەگەرلەرى قازاق ۇلتتىق قىزدار پەداگوگيكالىق ۋنيۆەرسيتەتىنىڭ 1-كۋرس ستۋدەنتتەرى ابدىبەك نۇراي، نۇرلىجان قاراقات جانە ءال-فارابي اتىنداعى قازۇۋ-دىڭ ستۋدەنتى بولاتبەكوۆ باعجان. 3 قاتىسۋشىعا ارنايى جۇلدە(30 000) بۇيىردى. جوبا اۆتورى - جۋرناليست، اباي اتىنداعى رممي-دىڭ ءمۇعالىمى جارقىن سالەن ۇلى.
"ءدىلمار" شەشەندىك ونەر ۇيىرمەسىنىڭ باستاماسىمەن جۇيەلى جولعا تۇسكەن رەسپۋبليكالىق بايقاۋ كورەرمەنننىڭ ايىزىن قاندىردى. وعان قاجەت 1 ميلليون تەڭگەنى "اتامۇرا" كورپوراسياسى دەمەۋشىلىكپەن ۇسىندى. قوناقتار مەن قاتىسۋشىلارعا بەلگىلى ءانشى نۇرجان جانپەيىس ءان شىرقاسا، ايتىسكەر اقىن التىنبەك يبراگيم جىردان شاشۋ شاشتى. ستۋدەنتتەر دە ءوز ونەرىن كورسەتتى. "ءدىلمار" مۇشەلەرى دەمەۋشى بولعان ۇلت جاناشىرى راقىمعالي ابرارۇلىنا سىيلىق جاسادى. ۋنيۆەرسيتەت رەكتورى اتىنان العىس حات تابىستالدى. وسىلايشا ۇلتتىق رۋحاني مۇرامىزدىڭ مەرەيى ۇستەم بولىپ، جوعارعى وقۋ ورىندارىنان شەشەندىك ونەر ۇيىرمەلەرى قۇرىلىپ، سايىستار وتەتىن بولدى. سايىستى كورۋگە رەسپۋبليكالىق اباي مەكتەبىنىڭ مۇعالىمدەرى مەن وقۋشىلارى دا ارنايى كەلدى. اباي ۋنيۆەرسيتەتى مەن اباي مەكتەبىنىڭ بايلانى ودان سايىن ارتا تۇسپەك.
"ءدىلمار - اقپارات".
