فيلولوگيا عىلىمىنىڭ كانديداتى:
– ەلىمىزدە ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ VI ءسامميتى باستالدى. وعان مەملەكەت باسشىسى قاسىم-جومارت توقايەۆ ءتوراعالىق ەتۋدە. سامميتتە پرەزيدەنت: «بۇگىن ءبىز بۇرىن-سوڭدى بولماعان گەوساياسي شيەلەنىس پەن الەمدىك ەكونوميكاداعى كۇشەيە تۇسكەن داعدارىس جاعدايىندا ءومىر ءسۇرىپ جاتىرمىز. بۇل قۇبىلىس ءقازىردىڭ وزىندە «جاھاندىق ديسفۋنكسيا» دەپ اتالدى. اوسشك-تىڭ بۇعان دەيىنگى 2019 جىلى وتكەن سامميتىنەن بەرى الەمدىك قوعامداستىق اۋىر سىناقتاردى باستان وتكەردى. ونىڭ سالدارى جاھاندىق دامۋعا ءالى دە اسەر ەتىپ وتىر. مەنىڭ ويىمشا، ءبىزدىڭ الدىمىزدا تۇرعان ەرەكشە ماڭىزدى مىندەت – تۋىنداعان زور قاۋىپ-قاتەرلەر جاعدايىندا حالىقارالىق قاتىناستارداعى تۇراقتىلىققا قول جەتكىزۋ. كوپجاقتى مەحانيزمدەرگە تىڭ سەرپىن بەرۋ جانە اشىق ديالوگقا ورالۋ اسا ماڭىزدى» دەدى.
تۇراقتىلىققا قول جەتكىزۋ ماسەلەسىن تەككە ايتىپ وتىرعان جوق. الەمدىك ەكونوميكاداعى شيەنەلىستەر كۇشەيگەن سايىن داعدارىستىڭ تا ارتاتىنى بەلگىلى. ءقازىر ازىق-تۇلىك قىمباتتادى، الەۋمەتتىك احۋال تومەندەدى دەپ، دابىل قاعىپ جاتىرمىز. حالىققا قاجەتى نە: بەيبىتشىلىك پەن تۇراقتىلىق. وسى قاسيەتتى ساقتاي الساق، الەۋمەتتىك قيىندىقتى دا شەشۋگە مۇمكىندىك بولادى.
وتكەندە استانا دىندەر سەزى ءوتتى. ريم پاپاسى فرانسيسك قازاقستانعا بەيبىتشىلىك ەلشىسى رەتىندە كەلگەنىن جەتكىزدى. ءوز سوزىندە ريم پاپاسى مىناداي ادەمى وي ايتتى: «سىزدەردە «بەرەكە باسى – بىرلىكتە» دەگەن ماتەل بار. بۇل بارلىق جەردە، اسىرەسە وسى جەردە ماڭىزدى ۇعىم ەكەنى ءسوزسىز. ەلدە 150-گە جۋىق ەتنيكالىق توپ پەن سەكسەننەن استام ءتىل بار. ءارتۇرلى تاريحى، مادەني جانە ءدىني داستۇرلەرى بار بۇل حالىقتار بىرلەسە، ادام ايتسا نانعىسىز ىنتىماقتاستىق ورناتقان». مۇنداعى ىنتاماقتاستىق تەرمينى تەككە ايتىلىپ وتىرعان جوق. قازاق قوعامىن دا بىرىكتىرىپ وتىرعان ءتۇيىن سول.
قوعامدا ءتۇرلى كوزقاراس قالىپتاسۋى مۇمكىن. بىرنارسە عانا اقيقات: بىرلىك بار جەردە تىرلىك بولادى. پرەزيدەنت وسى ماقساتتا جاقسى ديپلوماتيالىق ۇستانىمدى نەگىز ەتىپ وتىر. بۇل ەل تىنىشتىعى مەن قاۋىپسىزدىگى ءۇشىن دە ماڭىزدى.
