ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

قازاقستان بويىنشا 6 مىڭنان استام باقىلاۋشى دايارلايدى

17 قازان 2022 49
ەلىمىزدە 2022 جىلدىڭ 20 قاراشاسى كۇنى وتەتىن كەزەكتەن تىس پرەزيدەنتتىك سايلاۋىندا ەلىشىلك تۇراقتىلىق پەن سايلاۋ پروسەدۋرالارىنىڭ قاتاڭ ساقتالۋىن قامتاماسىز ەتۋ ماقساتىندا ەلىمىزدىڭ بارلىق اۋماعىن قامتيتىن وڭىرلىك شتابتارى بار تاۋەلسىز باقىلاۋشىلاردىڭ «BAQYLA» قوعامدىق قوزعالىسى قۇرىلادى.

اۋماقتىق باقىلاۋشىلار جەلىسى جۇمىسى الماتى قالاسىنداعى ورتالىق شتاب پەن ەلىمىزدىڭ 26 قالاسىندا ورنالاسقان وڭىرلىك شتابتار ارقىلى جۇرگىزىلەدى (ءتىزىم قوسىمشا ۇسىنىلادى).

ءبىزدىڭ قوزعالىستىڭ باقىلاۋشىلارى ەلىمىزدىڭ 26 ءىرى قالاسىندا بارلىعى 3،2 مىڭنان استام سايلاۋ ۋچاسكەلەرىندە باقىلاۋشىلىق جاسايدى.

سپيكەرلەردىڭ قىسقا پىكىرى:

دوس كوشىم:

Cايلاۋ پروسەسىنە بەلسەندى قاتىساتىن توپتىڭ ءبىرى – باقىلاۋشىلار. ولاردىڭ ساۋاتتى جۇمىس ىستەۋى، باقىلاۋدىڭ بارلىق تاسىلدەرىن تەرەڭ مەڭگەرە ءبىلۋى – قازاق ەلىندەگى سايلاۋ جۇيەسىنىڭ جاقسارۋىنىڭ ءبىر كەپىلى. مەنىڭ مىندەتىم – ءاربىر وبلىس. قالالارداعى باقىلاۋشىلاردى دايىندايتىن ترەنەرلەردى دايىنداۋعا ارنالعان ارنايى وفلاين، مۇمكىندىك بولسا، ون لاين  سەمينار-ترەنينگتەر جۇرگىزۋ، سايلاۋدى باقىلاۋ بارىسىندا تۋىنداعان سۇراقتارعا جاۋاپ بەرۋ بولىپ تابىلادى.

 

باقىتجان بۇقارباي:

2019 جىلى باقىلاۋشىلار ينستيتۋتى ەلدە جاڭا قارقىن الىپ، بيلىك ساناساتىن قوعامدىق كۇشكە اينالعانى بەلگىلى. ءبىز ازاماتتىق قوعامدى كۇشەيتۋىمىز كەرەك، ال باقىلاۋشىلار بولسا سول قوعامنىڭ مىزعىماس ويىنشىلارىنىڭ ءبىرى.

ءتۇرلى سەبەپتەرگە بايلانىستى ءقازىر ەلدەگى ازاماتتىق قوعامنىڭ كۇيىن كوڭىل كونشىتەتىندەي دەپ ايتۋعا كەلمەيدى. سول ءۇشىن ءبىزدىڭ ۇران «كۇن سايىن ازامات بول!» بولۋى كەرەك. مەن ءۇش جىل بۇرىن بەلسەندى باقىلاۋشىلاردىڭ قاتارىندا بولدىم، وسى جولى ەل بويىنشا باقىلاۋشىلاردى قالىپتاستىرۋعا دارىستەر وتكىزۋ ارقىلى اتسالىسايىن دەپ جاتىرمىن. باقىلاۋشىلاردىڭ نەگىزگى بولىگى جاستار بولماق دەپ ويلايمىن، اتاپ ايتقاندا، ولارعا «ازاماتتىق قوعام نە ءۇشىن كەرەك؟» جانە «قالاي ءتيىمدى پوست جازۋ كەرەك؟» تاقىرىپتارىندا دارىستەر وتكىزۋدى جوسپارلاپ وتىرمىن. بۇدان بولەك پروسەسكە جاڭا باقىلاۋشىلاردى تارتۋ دا جوسپاردا بار.

ارينە، ەلدەگى بۇكىل سايلاۋ ۋچاسكەلەرىن تولىق قامتۋ ءۇشىن 20 مىڭنىڭ ۇستىندە بىلىكتى باقىلاۋشى كەرەك، از بولىپ كورىنگەنمەن، ەل بولىپ وسى كورسەتكىشكە ءالى جەتە الماي كەلەمىز. ءبىراق كوش جۇرە تۇزەلەدى. 2019 جىلى ازاماتتىق بەلسەندىلەر كوتەرگەن تۋدى تۇسىرمەي، باعىتتان تايماي، باقىلاۋشىلار ينستيتۋتىن نىعايتۋدى جالعاستىرا بەرۋ كەرەك. سايلاۋدان سايلاۋعا باقىلاۋعا الىناتىن ۋچاسكەلەرىن سانى ارتسا، ەرتەلى-كەش حالىقتىڭ داۋىسى تۇگەل ەسكەرىلەتىن كۇنگە دە جەتەمىز.

اسحات قاسەنعالي:

ەلىمىزدە ءادىل ءارى شىنايى سايلاۋ وتكەنىن بارلىعىمىز دا قالايمىز. الايدا سايلاۋدىڭ شىنايى وتۋىنە بيلىكتى قۇلىقتى ەمەس. جاسىراتىنى جوق. سايلاۋدىڭ تازا وتۋىنە قاراپايىم ادامدار مۇددەلى. كوپتەگەن قازاقستان ازاماتىندا بەرگەن داۋىسىم، سالعان بيۋللەتەنىم وزگە كانديداتتىڭ قانجىعاسىنا بايلانىپ كەتۋى نەمەسە قوقىس جاشىگىندە جاتۋى مۇمكىن دەگەن كۇدىك بار. بۇل ۇزاق جىلدار بويى قالىپتاسقان جانە ءالى دە جالعاسىن تاۋىپ كەلە جاتقان سايلاۋداعى قۇيتىرقى ارەكەتتەردىڭ ناتيجەسى. ءبىز بۇل ولقىلىقتى تولىق شەشپەسەك تە، سايلاۋدا باقىلاۋشىلاردى قاتىستىرىپ، وقىتىپ كورگىمىز كەلەدى. ارينە، تۇتاس قازاقستاندى قامتۋ مۇمكىن ەمەس. ونى بيلىكتىك پارتيالار عانا جاساي الاتىن شىعار. ءبىراق بارىنشا كوپ ۋچاسكەنى قامتۋعا تىرىسامىز. ءىرى قالالاردى، وبلىس ورتالىقتارىن قامتۋعا تىرىسامىز. ەل بويىنشا 6 مىڭعا جۋىق باقىلاۋشى وقىتۋعا ارەكەتتەنىپ، جوسپارلاپ وتىرمىز.

 

 
بۇل ماقالا تۋرالى نە ويلايسىز؟