ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

جانبولات ماماي ەلدەگى وپپوزيسيا وكىلدەرىنىڭ بىرىگەتىنىن حابارلادى

22 اقپان 2022 85

سەيسەنبى كۇنى تىركەلمەگەن دەموكراتيالىق پارتيانىڭ جەتەكشىسى جانبولات ماماي بىرىككەن وپپوزيسيا قۇرىلعانىن مالىمدەدى. سونداي-اق ەل پاتريوتتارىن وداققا قوسىلۋعا شاقىردى. بۇل مالىمدەمە دەموكراتيالىق پارتيا جەتەكشىسىنىڭ Facebook پاراقشاسىندا جاريالانعان.

ماماي قاڭتار وقيعاسى كەزىندە وپپوزيسيادا بيلىككە تالاپ قوياتىن وكىلدى ورگان بولماعانىن مالىمدەدى. ايتۋىنشا، ءبىرتۇتاس ورتالىق قۇرۋ قاجەتتىگى كوپتەن بەرى كوتەرىلىپ كەلەدى.

– قاڭتار قىرعىنى تۇسىندا جۇزدەگەن ادام ەشبىر تەرگەۋ مەن سوتسىز اتىلدى، تۇرمەگە قامالدى جانە ادام ايتقىسىز ازاپتاۋعا ۇشىرادى. وكىنىشكە قاراي، ءدال سول كەزدە نارازىلىقتى باسقارا الاتىن حالىقتىڭ وكىلەتتى ورگانى جانە رەجيم وپپونەنتتەرىن بىرىكتىرە الاتىن ۇيىمى بولعان جوق. ناقتى تالاپتاردى قوياتىن جانە حالىقتى ەرتە الاتىن ۇيلەستىرۋ ورتالىعى نەمەسە وپپوزيسيالىق كۇشتەردىڭ بىرىككەن كەڭەسى بولمادى. وپپوزيسيالىق كۇشتەر باس بىرىكتىرۋى ءتيىس دەگەندى حالىق كوپتەن ايتىپ ءجۇر. دەموكراتيالىق كۇشتەردىڭ بىرىككەن ورتالىعىنىڭ قاجەتتىلىگى دە ءسوزسىز. قاڭتاردىڭ باسىنان ءبىز، قازاقستان دەموكراتيالىق وپپوزيسياسىنىڭ وكىلدەرى، ءوزارا كەلىسسوزدەر جۇرگىزىپ، ءبىراز اقىلداستىق. كوپ ماسەلەنى تالقىلادىق. قوعامدى جىك-جىككە ءبولۋ ءۇشىن بيلىك وسى ارالىقتا وزدەرىن «وپپوزيسيا» قاتارىنا جاتقىزعىسى كەلەتىن ءتۇرلى سايقىمازاقتاردى شىعارىپ، بىرنەشە ۇيىمدى قۇرىپ ۇلگەردى. ەندى ءبىز باس بىرىكتىرىپ، بەلسەندى ارەكەتكە كوشپەسەك، بۇل ۇلتتىق مۇددەگە قارسى ارەكەت بولا ما دەپ قاۋىپتەنەمىز. سوندىقتان، ءبىز، قازاقستاننىڭ دەموكراتيالىق وپپوزيسياسىنىڭ وكىلدەرى، بىرىگۋدىڭ باستالعانىن مالىمدەيمىز. بۇدان بىلاي ءبىز ءبىر تۋدىڭ استىنا جينالىپ، «بىرىككەن قازاق وپپوزيسياسىنىڭ» اتىنان ارەكەت ەتەمىز، – دەپ جازدى ول.

مامايدىڭ ايتۋىنشا، بىرىككەن وپپوزيسيادا كوشباسشى بولمايدى، قوسىلعاندار ءارقايسىسى ءوز قوزعالىسىنىڭ اياسىندا ارەكەت ەتەدى.



دەرەككوز
بۇل ماقالا تۋرالى نە ويلايسىز؟