ۋكراينا پرەزيدەنتى ۆلاديمير زەلەنسكيي رەسەي بيلىگى مەن ازاماتتارىنىڭ ۋكراينا اۋماعىنداعى مەنشىكتەرىن كۇشپەن تاركىلەۋ تۋرالى زاڭعا قول قويدى.
"رەسەي فەدەراسياسىنىڭ ۋكراينا مەن ۋكراين حالقىنا قارسى اگرەسسياسىن" العا تارتقان كييەۆ مەنشىكتەرى تاركىلەنگەن ازاماتتارعا وتەماقى تولەنبەيتىنىن ايتتى.
اتالعان قۇجاتتى جوعارعى رادا 3 ناۋرىزدا ماقۇلداعان.
زاڭ رەسەي ۇكىمەتى مەن سولاردىڭ مەنشىگىندەگى كومپانيالاردىڭ اكتيۆتەرىن تاركىلەۋدى ۇسىنادى.
مۇنداي اكتيۆتەردىڭ ءتىزىمىن ۇكىمەت قۇراستىرادى، كەيىن ول ۇلتتىق قاۋىپسىزدىك جونىندەگى كەڭەس پەن ۋكراينا قورعانىس مينيسترلىگىنە بەرىلەدى. اكتيۆتەردى تاركىلەۋ پرەزيدەنت جارلىعىمەن جۇزەگە اسىرىلادى.
24 اقپاندا رەسەي پرەزيدەنتى ۆلاديمير پۋتين ۋكراينانى "دەناسيفيكاسيا جانە دەميليتاريزاسيالاۋ" ماقساتىندا كورشى ەلگە "ارنايى اسكەري وپەراسيا" باستاعانىن حابارلاعان.
رەسەي اسكەرى ۋكراينا اۋماعىنا باسىپ كىرگەلى بەرى بۇۇ-نىڭ ادام قۇقىقتارى جونىندەگى جوعارعى كوميسسارىنىڭ مالىمەتى بويىنشا، ەلدە 516 بەيبىت تۇرعىن قازا بولعان، 908 ادام جاراقات العان.
دونەسك وبلىسىنداعى ەڭ ءىرى قالا ماريۋپول ءبىر اپتادان بەرى قورشاۋدا. 9 ناۋرىزدا رەسەي اسكەرى قالاداعى پەرزەنتحانا ورنالاسقان بالالار اۋرۋحاناسىنا اۋەدەن كۇشتى سوققى بەردى. ۋكراينا بيلىگىنىڭ ايتۋىنشا، اتقىلاۋ كەزىندە 3 ادام قازا بولعان، 17 ادام جاراقاتتانعان. قالادا ءبىر اپتادان بەرى جارىق، جىلۋ جانە تاماق جوق.
27 اقپاندا ۋكراينا بۇۇ حالىقارالىق سوتىنا رەسەي ۇستىنەن شاعىم ءتۇسىردى. كييەۆ رەسەيدى جاۋاپقا تارتۋدى، اتاپ ايتقاندا ۋكرايناعا سوعىس اشۋىن اقتاپ، "گەنوسيد" ۇعىمىن بۇرمالاعانى ءۇشىن سوتتاۋدى سۇراعان.
