ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

«زاماناۋي كلاسسيكا جانە رەبرەندينگ». Almaty TV جاڭا ماۋسىم تۇساۋىن كەستى

08 قىركۇيەك 2022 69
«الماتى» تەلەكانالى رەبرەندينگ وتكىزىپ، جاڭا جوبالار ۇسىندى. جاڭادان قابىلدانعان ءبىرتۇتاس يميدجدىك ستراتەگيا - رەيستايلينگ، جاڭعىرعان تۇجىرىمداما جانە حابار تاراتۋ كەستەسىندەگى تىڭ وزگەرىستەر.



«الماتى» تەلەارناسى جاڭا ماۋسىمدا وزىندىك ءونىم رەتىندە 26 باعدارلاما ۇسىنباق. ولاردىڭ ون ءبىرى – جاڭا جوبا. كورەرمەن سۇرانىسىن قاناعاتتاندىرا الماعان 13 باعدارلاما جابىلدى. 4 تەلەجوبانىڭ فورماتى وزگەرتىلدى.

تەلەكانالدىڭ باس ديرەكتورى تيمۋر بازاربايەۆتىڭ ايتۋىنشا، برەندتىڭ وزگەرۋى «Almaty TV» ارناسىنىڭ جاڭعىرۋىن جانە ءونىم ساپاسىن ارتتىرۋعا، ءداستۇرلى ەفير مەن سيفرلىق ينتەرنەت سينەرگياسىنا بەت العانىن كورسەتەدى. «الماتى» تەلەكانالى ەرەسەكتەر اۋديتورياسىن دا، الەۋمەتتىك جەلىلەر مەن ونلاين رەسۋرستاردى كەڭىنەن قولداناتىن جاس كورەرمەندەردى دە قامتي الاتىن «زاماناۋي كلاسسيكاعا» بارىنشا كوڭىل بولمەك.

«حابار تاراتۋدىڭ جاڭعىرعان تۇجىرىمداماسى جاستاردى كوبىرەك قامتۋدى كوزدەيدى. سوندىقتان ءبىزدىڭ باعدارلامالارىمىزدا وتباسىلىق قۇندىلىقتاردى نىعايتۋعا جانە وتباسى مۇشەلەرىنىڭ ىنتىماعىن ارتتىرۋعا باسا كوڭىل بولىنەدى. تەلەكانال باعدارلامالارىندا وتانعا دەگەن ماحاببات، جاقىنعا جاناشىرلىق، تاريحىمىزعا، مادەنيەت پەن ونەرىمىزگە قۇرمەتپەن قاراۋ سياقتى سياقتى قاسيەتتەر دارىپتەلىپ وتىرادى. وندىرىلەتىن باعدارلامالار مەن تەلەحيكايالاردىڭ 75 پايىزى قازاق تىلىندە بولادى. ءبىزدىڭ باستى مۇراتىمىز – كورەرمەندەرگە دەر كەزىندە، ءارى شىنايى اقپارات بەرۋ. ءبىز حالىقتى الاڭداتاتىن وزەكتى ماسەلەلەردى كوتەرۋمەن قاتار، كوپتەگەن ساۋالدارعا كورەرمەندەرمەن بىرگە جاۋاپ ىزدەيمىز. ءبىزدىڭ باستى مىندەتىمىز - وسى»، - دەپ اتاپ ءوتتى تيمۋر بازاربايەۆ.

Almaty TV جاڭا ماۋسىمدا ۇسىنىپ وتىرعان جوبالاردىڭ ىشىندە اينۇر ءىلياسوۆا، ءىنجۋ انۋاربەك، ايىم بەگماتتىڭ ايەل مەن بالا دەنساۋلىعى تۋرالى «انا مەن بالا» باعدارلاماسى، سەرىك اقىشيەۆتىڭ «IQ Almaty» اتتى مەكتەپ وقۋشىلارىنا ارنالعان ينتەللەكتۋالدىق ۆيكتوريناسى، دەمالىس كۇنگى تاڭعى شوۋ «سالەم، الماتى!»، «جۇلدىزدى تاكسي» اتتى مۋزىكالىق-ازىل باعدارلاماسى، سونداي-اق، «الماتىداعى اڭگىمە»، «تاڭعى ستۋديو»، «الماتينسكيە يستوريي»، «الماتى سو ۆكۋسوم»، «وبو ۆسەم بەز كۋپيۋر»، «شەشىمى بار»، «تەمىر تۇلپار» سياقتى جوبالار بار. جاڭا ماۋسىمدا ايتىس جانرىنا ارنالعان «ءبىرجان – سارا ىزىمەن» اتتى ەرەكشە فورماتتاعى باعدارلامانىڭ تۇساۋى كەسىلمەك.

بيىلعى كۇزدە «الماتى» تەلەكانالى وزىندىك ءونىم رەتىندە بىرنەشە تەلەحيكايا ۇسىنباق. ولاردىڭ ىشىندە مۇحتار اۋەزوۆتىڭ پوۆەسى جەلىسىمەن تۇسىرىلگەن «قيلى زامان» تەلەحيكاياسى، «جازمىش» مەلودرامالىق تەلەحيكاياسى، «اق پەن قارا»، «مەدەۋدەگى كەزدەسۋ»، «مەنىڭ باپكەرىم - 2» جانە «تايتالاس»، «مەنىڭ ءۇيىم" سيتكومى، سونىمەن قاتار، بايان الاگوزوۆا ۇسىنعان «تومپي» كومەدياسى بار. تەلەكانال العاش رەت «co-production» ءپرينسيپى بويىنشا، «Salem Social» كومپانياسىمەن بىرلەسىپ، «بيزنەس پو-كىزدارسكي» تەلەحيكاياسىن ۇسىنادى. بۇل تەلەحيكايا اۆتورلارى - YouTube جەلىسىندە ميلليونداعان كورەرمەنى بار جاس سەناريستەر مەن رەجيسسەرلار.

ەرتەڭ، 9 قىركۇيەكتە، ساعات 20:00-دە «Almaty TV» ەفيرىنەن «ۇلى سەلجۇكتەر» تەلەحيكاياسى كورەرمەنگە جول تارتادى. تۇرىك تەليەۆيدەنيەسى شىعارعان بۇل ەڭ ءىرى، تاريحي تەلەجوبانىڭ ءبىر ەرەكشەلىگى، وندا وتاندىق «HasSak» ەتنوگرافيالىق ءانسامبلىنىڭ ورىنداۋىندا قازاقتىڭ 9 كۇيى بەرىلەدى. سونىمەن قاتار، بۇل جوباعا جايداربەك كۇنعوجينوۆ جەتەكشىلىك ەتەتىن كاسىبي كاسكادەرلاردان تۇراتىن «Nomad Stans» توبى قاتىسقان.

«الماتى» كانالىن دامىتۋ بارىسىنداعى تاعى دا ءبىر نەگىزگى باعىت – ديدجيتال-ورتادا وزىندىك كونتەنت قالىپتاستىرۋ. مىسالى، جاقىن ارادا الەۋمەتتىك جەلىلەرگە «يا رەپورتەر»، «Jelide»، «Superمەن»، «كۇندەرەك»، «#REC» ، ت.ب. ينتەراكتيۆتىك جوبالار جول تارتادى .

21 شىلدەدە Almaty.tv سايتى اقپارات جانە قوعامدىق دامۋ مينيسترلىگىنىڭ اقپاراتتىق اگەنتتىك جانە جەلىلىك باسىلىم رەتىندە ەسەپكە الۋ تۋرالى كۋالىگىن الدى. 4 تامىزدان باستاپ «الماتى» تەلەارناسى قازاقستان رەسپۋبليكاسىنىڭ بارلىق اۋماعىندا مىندەتتى تۇردە كورسەتىلەتىن كانالدار تىزىمىنە ەنگىزىلدى.
بۇل ماقالا تۋرالى نە ويلايسىز؟