ءدىنتانۋشى قايرات جولدىباي ۇلى "مۇسىلمانشا نەكە قيۋ" ماسەلەسىنە بايلانىستى ويىن ورتاعا سالىپتى ءوز پاراقشاسىندا.
ونىڭ سوزىنشە، زاڭدى نەكەگە تۇرماعان جاس-جۇبايلاردىڭ ءدىني نەكەسىنە شەكتەۋ قويۋ ءارى وسى ءۇشىن ءدىني قىزمەتكەرلەردى جاۋاپقا تارتۋ - ورىنسىز دۇنيە.
"ءبىز زايىرلى مەملەكەت بولعاندىقتان، ءدىني نەكەنىڭ زاڭ تۇرعىسىنان ەشبىر سالماعىنىڭ جوقتىعى بارىمىزگە بەلگىلى جايت. ءدىني نەكە – سابيگە ات قويۋ، جانازا شىعارۋ سياقتى بار بولعانى ءداستۇرلى قۇندىلىق، رۋحاني جاۋاپكەرشىلىك، ءدىني ءراسىم. ول ءار ادامنىڭ سەنىم ماسەلەسى. ال ەندى قۇقىقتىق تۇرعىدان ەش سالماعى جوق رۋحاني قۇندىلىققا قاندايدا ءبىر شەكتەۋ قويۋ، ءدىني قىزمەتكەرلەردى ول ءۇشىن جاۋاپقا تارتۋ اتا-زاڭدا قورعالعان كىسىنىڭ نانىم-سەنىمىنە قىسىم جاساۋعا جاتادى.
احاج-عا تىركەلمەس بۇرىن ءدىني نەكە قيۋعا شەكتەۋ قويۋ قيسىنسىز. ەگەر بۇل رۋحاني قۇندىلىققا الگىندەي شەكتەۋ مەن تالاپ قوياتىن بولساق، وندا احاج-عا تىركەلمەس بۇرىن كەلىن ءتۇسىرۋ، بەتاشار جاساۋ، ۇلكەندەردىڭ باتا بەرۋ سياقتى ارەكەتتەرىنە دە، بۇگىندە كەڭ ەتەك الىپ بارا جاتقان ازاماتتىق نەكەگە دە شەكتەۋ قويىپ، جاۋاپقا تارتۋىمىز كەرەك بولادى"، - دەيدى ءدىنتانۋشى.
ايتۋىنشا، مۇندا باستىسى شاڭىراق كوتەرۋگە بەل بۋعان جۇپتاردىڭ نەكە جاسى جانە وزىندىك قالاۋى ەسكەرىلۋى شارت.
"ماسەلە نەكەنى قيۋدا ەمەس، ءدىني نەكەگە نيەتتى كىسىلەردىڭ زاڭدا كورسەتىلگەن جاسقا جەتىپ-جەتپەگەنى، ءوز ەركىمەن قيدىرىپ-قيدىرماعانى بولۋعا ءتيىس. سونداي-اق جاۋاپكەرشىلىك تە وزدەرىمەن عانا شەكتەلۋى كەرەك.
ءتۇرلى تەرىس اعامدىردىڭ قاتە ارەكەتتەرىن رەتتەۋ ءۇشىن ءدىني قۇندىلىقتارعا الگىندەي قيسىنسىز تالاپ قويۋ ياكي يمامداردى سول ءۇشىن جاۋاپقا تارتۋ دۇرىس شەشىم ەمەس. شىن مانىندە ءدىني نەكەنى قيدىرامىن دەگەن كىسى قاجەت بولسا، ونى يمامدارسىز-اق جاساي بەرەدى. قىرعىزستان سەكىلدى جاقىن شەتەلگە اسىپ، ياكي سول جاقتان بىرەۋدى شاقىرتىپ تا قيدىرا سالادى"، - دەپ جازدى ول الەۋمەتتىك جەلىدەگى پاراقشاسىندا.
ايتا كەتەيىك، كۇنى كەشە 2022 جىلى 17 قازاندا ەكس-مينيستر قۋاندىق بيشىمبايەۆ پەن سالتانات نۇكەنوۆانىڭ نەكەسىن قيعان رەسپۋبليكالىق باس مەشىتتىڭ يمامى قانات قىدىرمينگە قاتىستى تارتىپتىك شارا قولدانىلعانى حابارلانعان بولاتىن. بۇل تۋرالى ءمۇفتياتتىڭ باسپا ءسوز حاتشىسى اعابەك قونارباي ۇلى الەۋمەتتىك جەلىدەگى پاراقشاسىندا مالىمدەدى.
