ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

حالقى ءالى ميتينگكە شىعۋدا: قۇلسارى اكىمدىگى 1،8 ملرد تەڭگەگە ويىن الاڭىن سالعالى جاتىر (فوتو)

21 مامىر 2024 150

قۇلسارى قالاسىنىڭ تۇرعىندارى ءبىر اپتا بويى اكىمدىك الدىندا تۇنەدى. ولاردىڭ تالابى، سۋعا كەتكەن ۇيلەرىنىڭ باعالاۋ اقىسىن شارشى مەترگە 400 مىڭ تەڭگەگە كوتەرۋ. وسى ورايدا، حالقى دالادا قونىپ جاتقان قۇلسارىدا 1،8 ملرد تەڭگەگە بالالار ويىن الاڭى سالىنباق. بۇل تۋرالى Qazaq.today اقپاراتتىق اگەنتتىگى حابارلادى. 

مەملەكەتتىك ساتىپ الۋ سايتىنداعى اقپاراتقا سۇيەنسەك، قۇلسارى قالاسى اكىمى اپپاراتى لوت جاريالاپ، 2024 جىلى 26 ءساۋىر كۇنى تاراپتار شارت جاساسقان.

كونكۋرس رەيتينگتىك-بالدىق جۇيەنى پايدالانا وتىرىپ وتكەن. الەۋەتتى ءونىم بەرۋشى رەتىندە «ءومىرزاق» جاۋاپكەرشىلىگى شەكتەۋلى سەرىكتەستىگى تاڭدالعان.

شارت اتاۋىندا تۇرعىن ەمەس عيماراتتاردى / قۇرىلىستاردى سالۋ بويىنشا جۇمىستار ەكەندىگى كورسەتىلگەن. الايدا شارتتىڭ تەحنيكالىق سيپاتتاماسىندا قۇرىلىس الاڭى تۋرالى تولىق اقپارات جوق.

«بارلىق جۇمىستار جوبالاۋ-سمەتالىق قۇجاتتاماعا سايكەس ورىندالادى. ءونىم بەرۋشى شارت جاسالعاننان كەيىن جۇمىس كەستەسىن ۇسىنۋى ءتيىس سونداي اق شارت جاسالعاننان كەيىن 5 جۇمىس كۇنى ىشىندە ماتەريالدىق تەحنيكالىق بازانى راستايدى»، – دەلىنگەن شارتتا.

دەگەنمەن وسىعان ۇقساس ينفراقۇرىلىم قۇرىلىسى جانە اۋلالاردى اباتتاندىرۋ بويىنشا جاريالانعان وزگە مەملەكەتتىك تاپسىرىس سيپاتتاماسىندا ويىن الاڭى تۋرالى دەرەكتەردى تابۋعا بولادى.

اتالعان شارت 2024 جىلى 30 ءساۋىر كۇنى تىكەلەي ءبىر كوزدەن ساتىپ الۋ ءادىسى ارقىلى بەكىتىلگەن. قۇنى – 17 641 981 تەڭگە. بۇل سوماعا كاسىپورىن اۆتورلىق/تەحنيكالىق قاداعالاۋ بويىنشا قىزمەتتەر كورسەتۋگە ءتيىس.

وندا اتالعان نىساننىڭ باس جوبالاۋشىسى – «ۆيبو-ستروي» ج ش س ەكەندىگى كورسەتىلگەن. قىزىلوردا قالاسىندا تىركەلگەن كاسىپورىننىڭ جەتەكشىسى – مارات اتابايەۆ.

قورىتىندىدا قۇلسارى قالاسى اكىمىنىڭ 2023 جىلعى 16 قاڭتارداعى №81 شەشىمىمەن اۋدانى 10،7276 گەكتار جەر ۋچاسكەسى 5 جىل مەرزىمگە ۋاقىتشا پايدالانۋعا بەرىلگەندىگى ايتىلادى.

قۇرىلىس نىسانى جايىندا «ويىن الاڭىنىڭ نەگىزگى ماقساتى – بالالاردىڭ دەمالىسى مەن ويىن-ساۋىق ورنى رەتىندە قىزمەت ەتۋ. جارقىن، قىزىقتى بالالار ويىن الاڭدارى بالانىڭ بوس ۋاقىتىن ءارتاراپتاندىرۋعا جانە ونى قىزىقتى وتكىزۋگە تاماشا مۇمكىندىك بەرەدى. ولار تەك ويىن-ساۋىق ەمەس، سونىمەن قاتار دامىتۋشىلىق، ءتىپتى تاربيەلىك مانگە يە»، دەلىنگەن.

سونىمەن قاتار، تاپسىرىس بەرۋشىنىڭ قۇرىلىس جۇرگىزۋ بارىسىندا وتاندىق وندىرۋشىلەردىڭ قۇرالجابدىقتارىن، ماتەريالدارىن جانە كونسترۋكسيالارىن بارىنشا كوپ قولدانۋى قاجەت ەكەندىگىن اتاپ وتكەن.

ايتا كەتەلىك، قۇلسارى – سۋ تاسقىنىنان ەڭ كوپ زارداپ شەككەن ءوڭىردىڭ ءبىرى. ءقازىر تۇرعىندار قيراپ قالعان باسپانا ءۇشىن بەرىلەتىن وتەماقى مولشەرى مەن تولەۋ مەرزىمىنە نارازىلىقتارىن ءبىلدىرىپ، بەس كۇننەن بەرى نارازىلىق تانىتىپ جاتىر. ولار قيراعان تۇرعىن ءۇي ءۇشىن وتەماقى كولەمىن اكىمدىك ۋادە ەتكەن شارشى مەترىنە 200-240 مىڭ تەڭگەنىڭ ورنىنا 400 مىڭ تەڭگەدەن بەلگىلەۋدى تالاپ ەتىپ وتىر. ءارى اقشانى قۇرىلىس كومپانيالارىنا ەمەس، وزدەرىنە اۋدارۋدى سۇراعان.

بۇل ماقالا تۋرالى نە ويلايسىز؟