ۇقك 23 اقپاندا ۇلتتىق قاۋىپسىزدىك كوميتەتى ءتوراعاسىنىڭ بۇرىنعى ورىنباسارى مارات ءوسىپوۆتىڭ سوت سانكسياسىمەن قاماۋعا الىنعانىن حابارلادى. ول "لاۋازىمىن اسىرا پايدالاندى" دەگەن كۇدىكپەن 22 اقپاندا ۇستالعان.
ەلدەگى قاڭتار وقيعالارىنان سوڭ ۇقك ءتوراعاسى كارىم ءماسىموۆ جانە ونىڭ ەكى ورىنباسارى داۋلەت ەرعوجين مەن ءانۋار سادىقۇلوۆ قاماۋعا الىنعان. ولارعا بيلىكتى كۇشتەپ باسىپ الۋ، قىزمەتىن اسىرا پايدالانۋ جانە مەملەكەتكە وپاسىزدىق جاساۋ باپتارىمەن قىلمىستىق ءىس قوزعالعان.
ەلدىڭ ەكس-پرەزيدەنتى نۇرسۇلتان نازاربايەۆتىڭ جاقىن سەرىكتەرىنىڭ ءبىرى كارىموۆ ۇقك ءتوراعالىعىنا 2016 جىلى كەلگەن. ەرعوجين، سادىقۇلوۆ، ءوسىپوۆ ونىڭ ورىنباسارى بولىپ 2016 جىلى تاعايىندالعان.
ءماسىموۆتىڭ ءبىرىنشى ورىنباسارى قىزمەتىن نازاربايەۆتىڭ نەمەرە ءىنىسى سامات ءابىش اتقارىپ كەلگەن ەدى. ول دا قاڭتارداعى قىرعىننان سوڭ قىزمەتتەن كەتتى.
بيلىك قاڭتار وقيعاسىن مەملەكەتتىك توڭكەرىس دەپ اتاعان. ءبىراق توڭكەرىستى كىم جاساماق بولعانىن ناقتى اشىپ ايتپادى. رەسمي دەرەك بويىنشا، قاڭتار قىرعىنىىندا 227 ادام قازا بولىپ، جۇزدەگەن ادام قاماۋعا الىندى. ءقازىر 2،7 مىڭ قىلمىستىق ءىس قوزعالعان. ونداعان ادامنىڭ تۇرمەدە ازاپتالعانى دا ايتىلدى. باس پروكۋراتۋرانىڭ دەرەگىنشە، تۇرمەدەگى ازاپتاۋ كەزىندە التى ادام قازا تاپقان.
ساراپشىلار جىل باسىنداعى قاندى وقيعانى نازاربايەۆ پەن قازىرگى پرەزيدەنت قاسىم-جومارت توقايەۆتىڭ اينالاسىنداعىلاردىڭ ەليتاارالىق قاقتىعىس دەگەن. اقوردا مەن نازاربايەۆ ەليتاارالىق جانجالدى جوققا شىعارعان.
