ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

«ۇلتتىق يدەولوگياعا ورالۋ قاجەت»

03 اقپان 2024 48
ساۋالنامانىڭ ناتيجەسى نەگە ولاي بولدى دەسەك، ونىڭ ءبىر سەبەبى – يدەولوگيانى جوعالتىپ الۋىمىزدا. وتىز جىل بويى ءبىر ادامدى ماداقتاپ، ءبىر تۇلعاعا تابىنىپ كەلدىك. مەملەكەتتىك رامىزدەرگە ءوز دەڭگەيىندە قۇرمەت كورسەتىلمەدى جانە ونىڭ ءبارىن ءبىر ادام عانا جاساعانداي قىلىپ كورسەتتىك. سودان بارىپ حالىقتا نەمقۇرايلىلىق قالىپتاستى، ەشتەڭەگە ءمان بەرمەيتىن بويكۇيەزدىك پايدا بولدى.

ءالى دە كەش ەمەس. رامىزدەر كۇنىنە ايرىقشا ءمان بەرۋىمىز قاجەت. جوعالتىپ العان رەسپۋبليكا كۇنىن ورالتتىق قوي. ەگەمەندىك دەكلاراسياسى قابىلدانعان كۇننىڭ ماڭىزىن قايتا باعامداي باستادىق. ەلتاڭبانى دارىپتەۋگە دە سولاي كوڭىل بولگەن دۇرىس.

ءقازىر قازاقستاندىقتار شەتەلگە كوپ شىعادى. مۇمكىندىك مول. سول شەتەلگە شىققان ازامات قازاقستاننىڭ رامىزدەرىن، ەلتاڭباسىن كورسەتىپ، ماقتاناتىنداي بولۋى كەرەك. ونىڭ جولدارى كوپ. مەملەكەت باسشىسى جاستارعا ۇنەمى ءۇمىت ارتاتىنىن ايتىپ، ءبىزدىڭ ۇل-قىزدارىمىزعا جىگەر بەرىپ ءجۇر. قازاقتىڭ جاستارى وتە تالانتتى، ولار ەلتاڭبانى قالاي ناسيحاتتاۋدىڭ ۇلگىسىن ويلاپ تابادى دەپ ويلايمىن. كرەاتيۆتى ەكونوميكامەن اينالىسىپ جۇرگەن جاستارىمىز دا كوپ، ولار دا وسى ىسكە جۇمىلادى دەپ سەنەمىن.

مەملەكەتتىك ەلتاڭبا – حالقىمىزدىڭ تاريحى مەن مادەنيەتىنىڭ بەلگىسى. جاڭاشىل ەلىمىزدىڭ تەمىرقازىقتاي بەرىك نەگىزى، اسىل مۇراتى. سوندىقتان وعان قالاي بولسا سولاي قاراماۋىمىز كەرەك. الەمدە ءپاتريوتيزمنىڭ قانشاما ۇلگىسى بار. نەگە ۇلگى الماسقا؟ ءبىزدىڭ حالقىمىزدىڭ دا وزىندىك دۇنيەتانىمى قالىپتاسقان. ول – دالالىق وركەنيەت. بالكىم، وسىنى نەگىزگە الا وتىرىپ، زاماناۋي ۇلتتىق يدەولوگيانى قالىپتاستىرۋىمىز كەرەك شىعار؟! مەنىڭشە، ءبىز بۇل ماسەلەنى قوعام بولىپ كوتەرگەنىمىز ءجون. ءتىپتى، ۇلتتىق قۇرىلتايدا دا وسى جاعداي تالقىلانۋى ءتيىس.

ءبىز وتكەن وتىز جىل ىشىندە «الدىمەن ەكونوميكا، وزگەسى كەيىن» دەگەن ۇستانىمدى العا قويىپ، ءبىراز دۇنيەمىزدى جوعالتتىق. ەڭ الدىمەن سەنىمنەن ايىرىلدىق. مەملەكەتتىك رامىزدەرگە قۇرمەتتىڭ تومەندەۋىنىڭ ءبىر سەبەبى دە وسىندا ما دەيمىن. پرەزيدەنتىمىز جاڭا جىلدىڭ باسىندا باسپاسوزگە بەرگەن سۇحباتىندا «ءبىز وزىق ويلى ۇلت رەتىندە تەك قانا العا قاراۋىمىز كەرەك» دەگەندى ايتتى. زيالى قاۋىم، جاڭاشىل جاستار وسى ۇعىم اياسىندا وي بىرىكتىرسە، ۇسىنىس-پىكىرلەرىن ورتاعا سالسا جاڭا يدەولوگيانىڭ نەگىزى قالانار ەدى.

ءحانبيبى ەسەنقارا قىزى،

اقىن، ق ر ەڭبەك سىڭىرگەن قىزمەتكەرى

 

 

 
بۇل ماقالا تۋرالى نە ويلايسىز؟