قازاقتىڭ جۇيرىگى كابيرحان دۋبايدا وتكەن Al Maktoum Challenge Presented by Longines بايگەسىندە توپ جارعان بولاتىن. Qazaq Jockey Club ءتوراعاسى ماقسات احايەۆ دۋبايعا دەيىن كابيرحاننىڭ رەسەيدەگى جارىستارعا قاتىسقانىن، ول جاقتا قيانات جاسالعانىن ايتتى، دەپ حابارلايدى alash.kz.
«رەسەيدەگى قارسىلاستارى مىقتى بولدى. ءبىراق كابيرحان ول جاقتىڭ اتتارىن دا شاڭ قاپتىردى. ءبىز ەكىنشى كەلگەن سايىستارىن سانامايمىز. ويتكەنى ءتۇرلى-تۇرلى قياناتتار ىستەلىندى. ال دۋبايدا ءبىرىنشى رەت شاپقاندا ءبارىمىز دە ويلاندىق. بۇل رەسەي ەمەس. دەگەنمەن، سەنىمدى اقتادى. ءبىرىنشى جارىستا 2 مينۋت 3 سەكۋندتا مارە سىزىعىن قيدى. كەلەسى جارىسىندا رەكوردىن 3 سەكۋندقا جاڭارتتى. اتتىڭ توڭىرەگىندە جۇرگەن مامانداردىڭ كەۋدەسىن ماقتانىش كەرنەپ، ءبىر كوتەرىلىپ قالدى. بۇل اتتىڭ اكەسى جاپونيادا. وسى جەڭىستەن كەيىن جاپوندار قۇتتىقتاپ جاتىر»، – دەيدى ماقسات احايەۆ.
جەلىدە پىكىر جازعاندار ەندى رەسەيگە جارىسقا جىبەرمەۋ كەرەكتىگىن ايتىپ جاتىر.
«رەسەيگە جولاماعان دۇرىس»، «ماقسات اعا دۇرىس ايتىپ وتىر، ەندى وزىمىزدە بايگەنى كوتەرۋىمىز كەرەك»، «رەسەيدەن نەگە قورقاسىڭدار؟»، «رەسەيلىكتەر كورە المايدى»، «ورىستاردىڭ كوبىسى سات دەپ جالىنعان، ءبىراق يەسى كونبەگەن»، «ورىستار دوپينگ قولداندى دەپ بالە جاۋىپ جاتىر»، «رەسەيدە شاپتىرماۋ كەرەك» دەگەن پىكىرلەر بار.
ايتا كەتەيىك، كابيرحان 12 قارسىلاسىن ارتتا قالدىرىپ، مەيدان يپپودرومىنداعى 60 مىڭ كورەرمەننىڭ كوزايىمىنا اينالدى.
ماقسات احايەۆ بۇل جەڭىس قازاق اتبەگىلەرىنىڭ سونۋگە ءسال-اق قالعان ساۋلەسىن قايتا جاعۋمەن پارا-پار بولدى دەپ وتىر.
«مىقتى جاتتىقتىرۋشىلار، ترەنەر-جوكەيلەر شەتەلگە كەتىپ قالدى. ۇلى كوشپەندىلەردىڭ ەلىندە تۇرىپ، اتتاردى باپتاپ، وسىرە الماساق، ول بىزگە سىن»، – دەيدى Qazaq jockey club ءتوراعاسى.
4 جاستاعى اسىلتۇقىمدى ايعىردىڭ اكەسىنىڭ اتى – كاليفورنيا حروم، ەنەسىنىڭ ەسىمى – ليتتل ەميلي. كابيرحان اقش-تا تۋعان. 1،5 جاسىندا كينەلەند اۋكسيونىندا ساتىلعان. كابيرحاننىڭ بۇگىنگى يەسى – تىلەك مۇحانبەتقالييەۆ دەگەن ازامات. ەندى بۇل تۇلپار ناۋرىز ايىندا دۋبايدا وتەتىن بۇكىلالەمدىك كۋبوكتا ب ا ق سىنايدى.
