ۇلتتىق بانك بازالىق مولشەرلەمەنى تاعى تومەندەتتى

ۇلتتىق بانكتىڭ حابارلاۋىنشا، جىلدىق ينفلياسيا 2023 جىلدىڭ سوڭىنا قاراي ءبىر تاڭبالى مانگە جەتكەن. ايلىق ينفلياسيا جەلتوقساندا ورتاشا جىلدىق ماندەردەن ءبىرشاما جوعارى بولعان. سىرتقى ينفلياسيالىق پروسەستەر ازىق-تۇلىكتىڭ الەمدىك باعاسىنىڭ تومەندەۋى مەن ورتالىق بانكتەردىڭ تەجەۋ ساياساتىنا بايلانىستى قولايلى قالىپتاسىپ وتىر. فيسكالدىق ىنتالاندىرۋمەن قامتاماسىز ەتىلگەن ورنىقتى ىشكى سۇرانىس، سونداي-اق جوعارى جانە تۇراقسىز ينفلياسيالىق كۇتۋلەر تاراپىنان ىشكى ەكونوميكادا ينفلياسيالىق قىسىم ساقتالادى.

– جىلدىق ينفلياسيا 2023 جىلعى جەلتوقساندا 9،8%-عا دەيىن تومەندەدى. ۇلتتىق بانكتىڭ بولجامىنا سايكەس كەلدى. باعا ءوسىمىنىڭ باياۋلاۋى جۇرگىزىلىپ جاتقان اقشا-كرەديت ساياساتىنا، ازىق-تۇلىكتىڭ الەمدىك باعاسىنىڭ جانە ءوندىرىس شىعاسىلارىنىڭ تومەندەۋىنە، بيلىكتىڭ ينفلياسياعا قارسى شارالارىنا، سونداي-اق وتكەن جىلعى جوعارى بازا اسەرىنىڭ ىقپالىنا بايلانىستى. ايلىق ينفلياسيا ورتاشا جىلدىق ماندەرىنەن (0،7%) ءبىراز جوعارى قالىپتاسىپ، 0،8% بولدى. تۇتىنۋشىلىق باعالاردىڭ ورنىقتى بولىگىن سيپاتتايتىن بازالىق ينفلياسيا جەلتوقسان ايىندا ازداپ جەدەلدەدى. جالپى العاندا، بازالىق جانە ماۋسىمدىق فاكتورلاردى ەسكەرمەيتىن ينفلياسيا كورسەتكىشتەرى بىرنەشە اي بويى تۇراقتى بولىپ وتىر. بۇل رەتتە ولار ءالى دە بەلگىلەنگەن تارگەتتەن جوعارى. جالپى ينفلياسيانى 5%-عا دەيىن سەنىمدى تۇردە تومەندەتۋ ءۇشىن 2025-2026 جىلدارى ونىڭ ورنىقتى بولىگىن ودان ءارى باياۋلاتۋ قاجەت، – دەلىنگەن ۇب حابارلاماسىندا.

پروينفلياسيالىق تاۋەكەلدەر ينفلياسيالىق كۇتۋلەردىڭ تۇراقتانباۋىنا، فيسكالدىق ءيمپۋلستىڭ ىقتيمال كۇشەيۋىنە جانە تۇتىنۋشىلىق كرەديتتەۋدىڭ جوعارى وسۋىنە بايلانىستى. سونىمەن قاتار ىقتيمال تاۋەكەلدەر تومەن ءونىم ناتيجەسىندە ازىق-تۇلىك باعاسىنىڭ ديناميكاسىنداعى بەلگىسىزدىككە جانە رەتتەلەتىن باعالار سالاسىنداعى رەفورمالاردىڭ اياقتالماۋىنا بايلانىستى. سىرتقى سەكتوردا نەگىزگى ساۋدا-سەرىكتەستەردىڭ ءبىرى – رەسەيدەگى جوعارى ينفلياسياعا بايلانىستى تاۋەكەلدەر ءالى دە بار.

ۇلتتىق بانكتىڭ اقشا-كرەديت ساياساتى كوميتەتىنىڭ بازالىق مولشەرلەمە بويىنشا كەزەكتى جوسپارلى شەشىمى بيىل 23 اقپاندا جاريالانادى.