الەم ساياساتى مىڭ قۇبىلىپ تۇر. ۋكراينا پرەزيدەنتى ۆلاديمير زەلەنسكيي رەسەي پرەزيدەنتى ۆلاديمير ءپۋتيننىڭ “سەنىمسىز ادام” ەكەنىن جانە ۋكرايندار رەسەي فەدەراسياسىنا بەرىلمەيتىنىن تاعى قايتالادى.
بۇل تۋرالى زەلەنسكيي برازيليالىق جۋرناليستەرگە بەرگەن سۇحباتىندا مالىمدەدى.
“ماعان سەنىڭىز، پۋتين بىزدەن قاتتى قورقادى، مەن وعان سەنىمدىمىن. ويتكەنى ول وزىنە سەنىمسىز ادام. ۇلكەن ارمياسى بار، ۇلكەن مەملەكەتى بار سەنىمدى ادامدار الەمدى يادرولىق قارۋمەن قورقىتپايدى، ەرجۇرەك ادامدار وركەنيەتكە، جەردىڭ تىرشىلىگىنە، بارشا تىرشىلىك يەلەرىنە يادرولىق قارۋمەن ءقاۋىپ توندىرمەيدى. سوندىقتان مەن ءۇشىن بۇل "ءتۇردىڭ" ءپسيحوتيپى انىق. وسىنى تۇسىنە وتىرىپ، ءبىز ءوز ۇستانىمىمىزعا بەرىك بولۋىمىز كەرەك”، – دەيدى ول.
ۋكراينا پرەزيدەنتى ءوز ەلىنىڭ ەۋروپالىق وداققا كىرۋ جوسپارىنان باس تارتپايتىنىن اتاپ ءوتتى جۋرناليستەر الدىندا. بۇعان قوسا، ول ۋكراينانىڭ شەگىنبەيتىنىن دە جەتكىزدى.
“پۋتين ءۇشىن – جەڭىس باسقا حالىقتار مەن باسقا دا تاۋەلسىز ەلدەردى جويۋ ارقىلى كەڭەس وداعىن قالپىنا كەلتىرۋ دەگەن ءسوز. سوندىقتان ۋكراينا ەشقايدا شەگىنبەيدى. كورەيىك، بىزدە ءتيىستى تەحنولوگيالار بار، ءبىز سەرىكتەستەردەن جەتكىزىلىم بولۋى ءۇشىن كۇرەسىپ جاتىرمىز. بارلىعى وڭاي ەمەس، ەيفوريا جوق. ءبىراق ەشكىم قول قۋسىرىپ وتىرمايدى”، – دەيدى زەلەنسكيي.
