ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

تج ءمينيسترى ءشارىپحانوۆتىڭ لاۆرەنتيەۆكە ءسوزى وتپەيدى

09 قاڭتار 2024 56


توتەنشە جاعدايلار ءمينيسترى سىرىم ءشارىپحانوۆ بۇرىنعى امت – بۇگىنگى Qarmet كومپانياسىنىڭ باسشىسىنان شاحتالارداعى كەمشىلىكتەردى جويۋدى تالاپ ەتىلەتىنى جونىندە مالىمەت بەرسە دە، ول ءۇشىن قانشا ۋاقىت بەرگەنىن ايتا المادى.



«ءقازىر اقپارات الاڭىندا بۇرىنعى امت – بۇگىنگى Qarmet كومپانياسىنىڭ باسشىسى لاۆرەنتيەۆ شاحتالاردى تەكسەرىپ، كەمشىلىكتەردى تۇزەپ جاتقانى تۋرالى مالىمەتتەر تاراپ جاتىر. بۇل رەتتە ميتتالدىڭ كەزىندە جول بەرىلگەن كەمشىلىكتەردى جويۋ تالاپتارىن توتەنشە جاعدايلار مينيسترلىگى كومپانيا باسشىسىنا قالاي قويىپ وتىر؟ ميتتال بۇرىن اپات كەزدەرىندە كەلمەدى دە. ال لاۆرەنتيەۆكە تىستەرىڭىز باتا ما؟ وعان ءبارىن قالپىنا كەلتىرۋ ءۇشىن قانشا ۋاقىت بەرىپ وتىرسىزدار؟» - دەپ سۇراعان Ulysmedia.kz ءتىلشىسى مينيستردەن.

مينيستر ءشارىپحانوۆ تەكسەرۋ ارينە، ءبىزدىڭ مىندەتىمىز دەيدى.
«بۇرىن دا ەستىگەن بولارسىز – تەكسەرۋ كەزىندە ءبىز الدىن الا ءبىر جىلدا جوسپار قۇرىپ، ءبىر اي بۇرىن تەكسەرەتىن مەكەمەگە تانىستىرامىز (؟). سول سەبەپتى ارينە، كوپ ماسەلە شەشىلىپ تۇرادى. ءبىراق وعان قاراماستان كەمشىلىكتەر بار. ولاردى انىقتاپ، ونى تۇزەتۋگە ۋاقىت بەرەمىز. ەگەر تۇزەمەي جاتسا، ايىپپۇل سالامىز»، - دەيدى ول.

«كومپانيا باسشىسىنا قانشا ۋاقىت بەرىپ وتىرسىزدار؟ تالاپتى ورىنداماسا قانشا ايىپپۇل سالىنادى؟» بۇل سۇراققا ءشارىپحانوۆ ماسەلە ءقازىر باقىلاۋدا دەگەنىمەن ناقتى مەرزىمدى تاعى ايتپادى.
«كارمەت كومپانياسىنا ۋاقىت بەرىپ وتىرمىز. تۇزەتۋگە، جويۋعا. ينۆەستوردىڭ جۇمىسى وتە كوپ. ەڭ بىرىنشىدەن، ءوندىرىستى جۇرگىزىپ، كومپانيا جۇمىسىن توقتاتپاۋ كەرەك. سول باعىتتا بىزدە كومەك، كونسۋلتاسيا بەرىپ وتىرمىز. تەكسەرۋ دە جوسپارلى تۇردە بولادى. ارنايى كوميسسيا بار. ءقازىر تەك تالاپ ەتىپ، ۋاقىت بەرىپ دەگەن دۇرىس ەمەس سياقتى. سوندىقتان، ءبىز انىق ۋاقىتتى جۇمىس رەتىندە بەلگىلەيمىز»، - دەيدى ول.

ەسكە سالايىق، 28 قازانعا قاراعان ءتۇنى «ارسەلورميتتال تەمىرتاۋ» كەنىشىندە جارىلىس بولدى. جارىلىس كەزىندە شاحتادا 252 ادام بولعان، 206 كەنشى جەر بەتىنە شىقتى، 46 كەنشى قازا بولدى.

شاحتادا كوز جۇمعان جۇمىسشىلاردىڭ تولىق ءتىزىمى جاريا بولدى. قازاقستان پرەزيدەنتى توقايەۆ «ارسەلورميتتال تەمىرتاۋمەن» ىنتىماقتاستىقتى توقتاتۋعا بۇيرىق بەردى. قايعىلى وقيعا بويىنشا سوتقا دەيىنگى تەرگەۋ  دە ءجۇرىپ جاتىر.

سونداي-اق، ۇكىمەتتىڭ «ارسەلورميتتال تەمىرتاۋ» اق اكسيونەرلەرىمەن الدىن الا كەلىسىمگە كەلگەنى جانە كاسىپورىندى قازاقستاننىڭ پايداسىنا مەنشىك قۇقىعىنا بەرۋ جونىندەگى مامىلەنىڭ اياقتالىپ جاتقانى ايان.

بەلگىلى ەكونوميست، 2022 جىلى پرەزيدەنتتىككە ۇمىتكەر بولعان مەيرام قاجىكەن بيلىك كوستەنكو شاحتاسىنداعى اپاتقا بار كىنانى "ارسەلورميتتال تەمىرتاۋ" كومپانياسىنىڭ اكسيونەرى لاكشمي ميتتالعا جاۋىپ وتىرعانىن، ال شىن مانىندە كەنشىلەردىڭ ولىمىنە 90% ۇكىمەتتىڭ ءوزى كىنالى ەكەنىن مالىمدەگەن بولاتىن. الايدا پرەمەر-مينيستر ءاليحان سمايىلوۆ ۇكىمەتتى اقتاپ، جاۋاپكەرشىلىكتى كاسىپورىن باسشىلىعىنا سىرعىتتى.

بۇل ماقالا تۋرالى نە ويلايسىز؟