ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

تولەم كارتانى قابىلداۋدان باس تارتقان كاسىپكەر ايپپۇل سالىنادى

13 قاڭتار 2024 34
بۇدان بىلاي قولما قول اقشا تالاپ ەتكەن كاسىپكەرلەر ايىپپۇل تولەۋى مۇمكىن. بۇل تۋرالى قارجى ۆيسە ءمينيسترى حابارلادى. ونىڭ ايتۋىنشا، ءموبيلدى اۋدارىمداردى تەكسەرۋ زاڭسىز كاسىپكەرلىكتى «كولەڭكەدەن» شىعارۋعا باعىتتالعان. 
«كەيبىر كاسىپكەر ساتىلعان تاۋارلار مەن قىزمەتتەر ءۇشىن تولەمدى ءموبيلدى اۋدارىمدار ارقىلى الادى. الايدا بۇل اۋدارىمدار كاسسالىق اپپاراتتاردى، POS-تەرمينالداردى جانە QR-كودتاردى قولدانباي جۇرگىزىلەدى. سوعان سايكەس تۇبىرتەك (چەك) بەرىلمەيدى جانە تۇتىنۋشىلاردىڭ قۇقىقتارى بۇزىلادى»، – دەدى ۆيسە-مينيستر ەرجان ءبىرجانوۆ.

ونىڭ ايتۋىنشا، مەملەكەت ءموبيلدى اۋدارىمداردىڭ بارلىعىن بىردەي تەكسەرمەيدى. ءتۇرلى تۇلعالاردان 3 اي قاتارىنان اي سايىن 100 نەمەسە ودان دا كوپ ءموبيلدى اۋدارىمدار العان تۇلعالار عانا تەكسەرۋگە جاتادى. ياعني كاسىپكەرلىكتىڭ بەلگىلەرى بايقالعان جاعدايدا تەكسەرۋ جۇرگىزىلەدى.
«جەكە تۇلعالار بۇرىنعىداي وزدەرىنىڭ جەكە ماقساتتارى ءۇشىن تۋىستارىنا، دوستارىنا، اتا-انالارىنا، بالالارىنا جانە باسقا دا ومىرلىك جاعدايلارعا بايلانىستى ءموبيلدى اۋدارىمدار جاساپ، قابىلداي الادى. بۇعان قاتىستى ەشقانداي شەكتەۋ جوق»، – دەدى ءبىرجانوۆ.

«تولەمدەر جانە تولەم جۇيەلەرى تۋرالى» زاڭنىڭ نورمالارىنا سايكەس ءتۇرلى تولەم تۇرلەرى بار. مىسالى، بانك كارتاسى، QR-تولەم نەمەسە قولما-قول اقشا ارقىلى. قولما-قول اقشاسىز تولەمدەردى قابىلداۋدان باس تارتۋ زاڭسىز. مۇنداي جاعدايدا تۇتىنۋشىلاردىڭ قۇقىعى بۇزىلادى.
«كاسىپكەرلەر تولەم كارتالارى ارقىلى تولەمدەردى قابىلداۋدان ءبىرىنشى رەت باس تارتسا، وندا ەسكەرتۋ بەرىلەدى. ال مۇنداي قۇقىق بۇزۋ قايتالانسا، وندا 147 680 تەڭگە مولشەرىندە ايىپپۇل سالىنادى. قولما-قول اقشاسىز تولەمدەردى قابىلداۋدان باس تارتۋ فاكتىلەرى تۋرالى تۇرعىلىقتى جەرى بويىنشا مەملەكەتتىك كىرىس ورگاندارىنا جۇگىنۋ قاجەت»، – دەدى ۆيسە-مينيستر.

ول تاكسي جۇرگىزۋشىلەرىنىڭ قىزمەتىنە قاتىستى ماسەلەگە دە توقتالدى.
«جەكە تاسىمالداۋشىلار جەكە كاسىپكەر رەتىندە تىركەلۋى كەرەك. مۇنى e-Salyq Business، eGov mobile ءموبيلدى قوسىمشالارى جانە كەيبىر ەكىنشى دەڭگەيدەگى بانكتەردىڭ قوسىمشالارى ارقىلى جاساۋعا بولادى. بۇل رەتتە قولما-قول اقشاسىز تولەمدەردى قابىلداۋ ءۇشىن ونلاين رەجيمىندە كاسىپكەرلىك بانك شوتىن اشۋعا بولادى. وندا كورسەتىلگەن قىزمەتتەر ءۇشىن تولەمدەر الىنادى. ول ءۇشىن سىزگە تەك سمارتفون قاجەت. كاسسالىق اپپاراتتار مەن POS-تەرمينالداردى الىپ ءجۇرۋدىڭ قاجەتى جوق. قازىرگى تاڭدا سالىق مىندەتتەمەلەرىن ادال ورىنداۋ الدەقايدا ءتيىمدى»، – دەدى ول.

ونىڭ سوزىنشە، بۇگىندە سالىق رەجيمدەرىنىڭ ءتارتىبى جەڭىلدەتىلدى، سالىق ستاۆكالارى كاسىپكەرلىك تۇرلەرىنە بايلانىستى تەك 1%-دان 4%.
«ەگەر مۇنداي جاعدايدا كاسىپكەر ءموبيلدى اۋدارىمدار قابىلداسا، وندا ول ءقازىردىڭ وزىندە «كولەڭكەدە» قالىپ، سالىق باقىلاۋىنا تۇسەدى. بۇل رەتتە ءموبيلدى اۋدارىمداردى تەكسەرۋ ادال سالىق تولەۋشىلەرگە اسەر ەتپەيدى»، – دەدى ەرجان ءبىرجانوۆ.
بۇل ماقالا تۋرالى نە ويلايسىز؟