موڭعولياداعى بايان-ولگەي ايماعىنا قاراستى ولگەي سۇمىنىنىڭ وقۋشىلارى قازاقستانداعى سۋ تاسقىنىنان زارداپ شەككەن حالىققا قولداۋ ءبىلدىرىپ، ۆيدەوسالەمدەمە جولدادى. بۇل تۋرالى "وتانداستار قورى" حابارلادى.
"وتانداستار قورى" باسپا ءسوز قىزمەتىنىڭ حابارلاۋىنشا، ولگەي سۇمىنىندا ورنالاسقان №1 جالپى ءبىلىم بەرەتىن مەكتەبىنىڭ 6 "ب" سىنىپ وقۋشىلارى قازاقستاندا سۋ تاسقىنىنان زارداپ شەككەن ايماق بالالارىنا 200 مىڭ توگروگ اقشا اۋداردى. سونداي-اق ولار ۆيدەوجولداۋدا قازاقستاندىق بالالارعا قولداۋ ءبىلدىرىپ، موڭعولياداعى قانداستاردى قازاقستان حالقىن قولداۋعا ۇندەدى.
ءبىرىنشى وقۋشى:
"ءوزىڭ عانا ويلاعان،
جاماندىقتىڭ بەلگىسى.
وزگەنى دە ويلاعان،
ادامدىقتىڭ بەلگىسى.
ەكىنشى وقۋشى:
ءبىر ءۇي اش بولسا، ءبىر اۋىل اش. ءبىر اۋىل اش بولسا، بۇكىل ەل اش.
ءۇشىنشى وقۋشى:
ءبىز كۇندەلىكتى كەرەكتەنەتىن، ءتاتتى زاتتار ساتىپ الاتىن اقشامىزدى وسى جولى قازاقستاندىق دوستارىمىزعا جىبەرەمىز.
ءتورتىنشى وقۋشى:
سىنىبىمىزدىڭ جانە ءمۇعالىمىمىزدىڭ اتىنان قازاقستاندىق دوستارىمىزعا 200 مىڭ توگروگ ۇسىنامىز.
بەسىنشى وقۋشى:
قازاقستان رەسپۋبليكاسىنىڭ كەيبىر وڭىرلەرىندە سۋ تاسقىنى بولىپ جاتىر. قازاق حالقى – باسىنا ءىس تۇسسە، بىر-بىرىنە كومەكتەسەتىن باۋىرمال جاندار. موڭعولياداعى بارشا اعايىندى قازاقستانعا كومەكتەسۋگە شاقىرامىز.