ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

رەسەيدىڭ ورىنبور قالاسىندا 8 مىڭعا جۋىق شارۋاشىلىق تەلىمى مەن 3 مىڭعا جۋىق ءۇيدى سۋ باستى

14 ءساۋىر 2024 518

رەسەيدىڭ ورىنبور قالاسىندا ءبىر كۇندە تاعى 800 ءۇي مەن 1800 ۋچاسكەنى سۋ باستى. ورىنبور قالاسىندا بارلىعى 3 مىڭ ءۇي مەن 8 مىڭ شارۋاشىلىق جەر سۋ استىندا قالدى. 

بۇل تۋرالى تىلشىلەرگە قالالىق ديسپەچەرلىك ورتالىقتىڭ ديرەكتورى الەكساندر سيسا ايتتى.

"ءبىر كۇننىڭ ىشىندە 1800-گە جۋىق ءۇي ىرگەسىندەگى جەر مەن 800-گە جۋىق ءۇيدى سۋ باستى، بارلىعى 8 مىڭعا جۋىق شارۋاشىلىق تەلىمى مەن 3 مىڭعا جۋىق ءۇي بار"، - دەدى ول.

دونگۋزسكايا جانە ۋرالسكايا كوشەلەرىن سۋ باسۋىنا بايلانىستى تۇرعىنداردى ەۆاكۋاسيالاۋعا جول پوليسياسى مەن توتەنشە جاعدايلار قىزمەتىنىڭ كولىكتەرى جىبەرىلگەن. "گراند پارك" تۇرعىن ءۇي كەشەنىن دە سۋ باسىپ، پوتەحين مەن ۋرالسكايا كوشەلەرىنىڭ بويىندا سۋ كوپقاباتتى ۇيلەرگە جاقىندادى. تاعى 55 ادام ەۆاكۋاسيالاندى، ونىڭ 183ء-ى ۋاقىتشا ورنالاستىرۋ پۋنكتەرىنە جەتكىزىلدى.

اگەنتتىك مالىمەتىنشە، ورىنبوردىڭ جايىق وزەنى بولىگىندەگى سۋ بەليايەۆسكايا كوشەسىنە جەتكەن، ونداعى وتكەل جابىلعان. بۇل كوشەنىڭ اۋماعىندا قويمالار مەن دۇكەندەردى سۋ باسىپ، جەكە سەكتورعا جەتكەن. سونداي-اق بەليايەۆسكايا كوشەسى اۋدانىنداعى "مەديك" باۋ-باقشا سەرىكتەستىگى سۋ استىندا قالدى. باۋ-باقشا سەرىكتەستىگى مەن بەليايەۆسكايا كوشەلەرىنىڭ اراسىنداعى بوس اۋماقتى سۋ باستى. ورىنبوردىڭ بۇل بولىگىنە ورتالىقتان جانە باسقا دا شاعىن اۋداندارعا ەندى تەك ورىنبور اۋدانى اۋماعىمەن وتەتىن اينالما جولدىڭ بويىمەن عانا جەتۋگە بولادى.

ايماق باسشىلىعى باسپا ءسوز قىزمەتىنىڭ حابارلاۋىنشا، 13 ساۋىردەگى جاعداي بويىنشا 25 باۋ-باقشا سەرىكتەستىگى، زارەچنىي، "گراند پارك" شاعىن اۋداندارىندا، كۋزنەچنىي، كۋيبىشيەۆ، "دۋبكي" تۇرعىن ءۇي كەشەنى گازدان اجىراتىلعان. 64 باۋ-باقشا سەرىكتەستىگى، كۋزنەچنىي شاعىن اۋدانى، تاعى ءبىرقاتار كەنتتەر مەن شاعىن اۋدان، كوشەلەر جارىقسىز قالدى. جابدىقتاردى سۋ باسقاندىقتان، شافەيەۆ كوشەدەگى "ورەنتريكوتاج" قازاندىعى ءسوندىرىلدى.

ەسكە سالا كەتسەك، ورىنبور وبلىسىندا تاسقىن سۋ جايىق وزەنىمەن تومەن قاراي اعىپ، ءبىرقاتار ەلدى مەكەندى، ونىڭ ىشىندە قازاقستاندى دا سۋ باسۋ ءقاۋپى ءتونىپ تۇر.

بۇل ماقالا تۋرالى نە ويلايسىز؟