قازاقستان الماتىداعى تارتىپسىزدىكتەرگە قىرعىزستاندىقتاردىڭ قاتىستىلىعى تۋرالى ەشقانداي دالەل تاپپادى. بۇل تۋرالى Orda.kz سايتى جازدى دەپ حابارلايدى Alash.kz.
«پروكۋروردىڭ ورىنباسارى نۇرلان اۋعانبايەۆپەن اڭگىمەلەسۋ بارىسىندا اعىمداعى جىلدىڭ قاڭتارىندا قازاقستانداعى جاپپاي تارتىپسىزدىكتەرگە قىرعىزستان ازاماتتارىنىڭ قاتىسقانى تۋرالى دەرەكتەر جوق ەكەنى اتاپ ءوتىلدى» دەدى قىرعىزستان ومبۋدسمەندىك كەڭسەسىنىڭ باسقارما باسشىسى اسقات ازاربەكوۆ.
ول قىرعىز رەسپۋبليكاسىنىڭ كوپتەگەن ازاماتتارى قازاقستانعا ەڭبەك قىزمەتى ماقساتىندا كەلگەنىن جانە جاعدايدى تۇراقسىزداندىرۋعا قاتىسۋ ماقساتىمەن ەمەس، ادامنىڭ قاراپايىم قىزىعۋشىلىعىنىڭ ناتيجەسىندە وقيعانىڭ قالىڭ ورتاسىندا قالۋى مۇمكىن ەكەنىن اتاپ ءوتتى.
«سونىمەن قاتار، ءبىز ەشبىر جاعدايدا ءوز ازاماتتارىمىزدى قىلمىسقا شىنىمەن كىنالى بولسا، اقتاعىمىز كەلمەيدى. ءبىراق ولاردىڭ تىكەلەي كىناسى نەمەسە قازاقستان زاڭناماسىن بۇزۋعا قاتىسى ازاپتاۋ ارقىلى ەمەس، زاڭدى تۇردە دالەلدەنۋى ءتيىس» دەدى ازاربەكوۆ.
ەسكە سالساق، بۇعان دەيىن قازاقستاندا الماتىدا قىرعىز مۋزىكانتى ۆيكرام رۋزاحۋنوۆتى ازاپتاۋ فاكتىسى بويىنشا قىلمىستىق ىستەر قوزعالعانى حابارلانعان بولاتىن.
قاڭتار وقيعاسى كەزىندە ءىز-تۇزسىز جوعالعان قىرعىزستاننىڭ تاعى ءبىر ازاماتى – چولپونبەك سىدىقوۆ. اياعى مەن قابىرعاسى سىنعان ول 11 كۇننەن كەيىن عانا تابىلعان. ول سونداي-اق قازاقستاندىق ءتارتىپ ساقشىلارىن ازاپتادى دەپ ايىپتادى.
