قازاقستاندا جاريالانعان تاڭىرشىلدىك سەنىمىن ءدىن رەتىندە مويىندالۋدى تالاپ ەتەتىن پەتيسياعا قاتىستى دەپۋتات پىكىر ءبىلدىردى. ءماجىلىس كۋلۋارىندا ەدىل جاڭبىرشين تاڭىرشىلدىكى تالاپ ەتكەندەردىڭ "اداسۋشىلار بولۋى مۇمكىن" ەكەنىن ايتىپ، قوجا احمەت ياسساۋي، بەكەت اتا، شاكارىم، ابايلاردىڭ "اداسپاعانىن" ەسكەرتتى، دەپ حابارلايدى Alash.KZ ۇلتتىق پورتالى.
دەپۋتات ەدىل ءجاڭبىرشيننىڭ پىكىرىن Qaz365.kz پورتالى جاريالادى. دەپۋتات ءوز پىكىرىندە تاڭىرشىلدىكتىڭ دەگەن ءدىن ەمەس ەكەنىن،اتا-بابا يسلام ءدىنىن ۇستاعانىن ايتادى:
«تاڭىرشىلدىك دەگەن ءدىن ەمەس. ءبىزدىڭ اتا-بابامىزدىڭ ۇستاعان ءدىنى – يسلام. سوندىقتان بۇلار اداسۋشىلار بولۋى مۇمكىن. دۇرىستاپ وقىسىن، زەرتتەسىن. قوجا احمەت ياسساۋي، بەكەت اتا، شاكارىم، ابايلار اداسپاعان شىعار دەپ ويلايمىن»، - دەيدى ەدىل جاڭبىرشين.
سونىمەن قاتار، دەپۋتات ءوزىنىڭ يسلام ءدىنىن ۇستاناتىنىن ايتىپ، ءوز زەرتتەۋلەرىنىڭ، ىزدەنىسىنىڭ، سەنىمدەرىنىڭ ناتيجەسىندە ءدىندى ءوزى تاڭدايتىنىن جەتكىزدى:
«اركىم ءوز زەرتتەۋلەرىنىڭ، ىزدەنىسىنىڭ، سەنىمدەرىنىڭ ناتيجەسىندە ءدىندى ءوزى تاڭدايدى. ەڭ باستىسى ءدىن تەرروريزم مەن ەكسترەميزمنىڭ قۇرالى بولماۋعا ءتيىس. ءدىندى ساياسي قۇرالعا اينالدىرۋعا بولمايدى. ول قوعامدا داۋ تۋدىرماۋى كەرەك. ەگەر مۇنداي بەلگىلەر بولسا، وندا بۇل ءدىن ەمەس. بىزدە ءتيىستى مەملەكەتتىك ورگاندار بار. ولار پەتيسيا مەن ۇسىنىستارعا وزدەرى جاۋاپ بەرىپ، قاراستىرادى»، – دەدى دەپۋتات.
ەستەرىڭىزگە سالا كەتەيىك، كەشە Epetition.kz رەسمي سايتىندا قازاقستاندا تاڭىرشىلدىكتى ءدىن رەتىندە تانۋدى سۇرايتىن پەتيسيا جاريالاندى. ءبىز ۇندەۋدىڭ ادىلەت ءمينيسترى ازامات ەسقارايەۆقا جولدانعانىن جازعانبىز:
قازاقستاننىڭ تاڭىرشىلەرى اتىنان «ءدىني قىزمەت جانە ءدىني قىزمەت تۋرالى» زاڭىنا سايكەس «ءتاڭىر ەلى» رەسپۋبليكالىق تاڭىرلىك ءدىني بىرلەستىگىن رەسمي تىركەۋگە قاتىستى ءبىزدىڭ باستامامىزدى قولداۋىڭىزدى سۇرايمىز. سوڭعى جىلدارى قازاقستاندا ەرتە ورتا عاسىرلاردا ءبىرقاتار كونە تۇرىك قاعاناتى مەن يمپەريالارىنىڭ كۇشەيۋى كەزىندە قالىپتاسقان تاڭىرلىك نانىم-سەنىمدەردى ۇستانۋشىلار سانى ارتىپ كەلەدى. ءتاڭىرشىلمىن دەپ اشىق ايتاتىن ازاماتتاردىڭ سانى بىرنەشە جىلدىڭ ىشىندە 1 ميلليوننان اسادى دەگەن بولجام بار، – دەلىنگەن پەتيسيادا.
