كەشىلەردىڭ جاقىندارى استاناعا باردى. پاۆلودار وبلىسى مايقايىڭ التىن كەن ورنىندا 4 جولاۋشىسى بار اۆتوبۋس شۇڭقىرعا قۇلاپ، ەكى ادام سىرتقا شىعارىلعان بولاتىن. ال قالعان ەكى ادام 90 كۇننەن بەرى ءالى تابىلماي جاتىر. ولاردى ىزدەۋ جۇمىستارى بيىل 23 اقپاندا توقتاپ قالعان.
سول تابىلماي جاتقان ازاماتتاردىڭ تۋعان-تۋىستارى استاناعا كەلىپ، پرەزيدەنت اكىمشىلىگى، ۇكىمەت پەن باس پروكۋراتۋراعا ارىز قالدىردى. ولار ىزدەۋ جۇمىستارىن قايتا باستاۋدى تالاپ ەتەدى.
– استاناعا كەلىپ، بۇكىل ءوتىنىم، ارىزدارىمىزدى ۇكىمەتكە، پرەزيدەنت اكىمشىلىگىنە، باس پروكۋراتۋراعا قالدىردىق. ولار ءبىزدىڭ ارىزدى قابىلدادى. 23 اقپاندا قازۋ جۇمىستارىن توقتاتىپ تاستادى. ەستەرىڭىزدە بولسا، اۋەلى 4-7 اقپان ارالىعىندا ءبىر توقتاتقان ەدى. ەندى 23 اقپاننان بەرى ءبىر جارىم اي ءوتتى. قازۋ جۇمىستارى سول كۇيى قايتا باستالعان جوق. نەگىزگى سەبەپ – ساراپتامانىڭ جوسپارلى جوباسىنىڭ بولماۋى. 26-27 اقپان كۇندەرى پاۆلودار وبلىسى اكىمدىگىنىڭ باسشىلىعىمەن كەزدەسكەن كەزدە ۇققانىمىز، «مايقايىڭ التىن» كومپانياسى مەن پۆاز (كاسىبي اسكەري اپاتتىق قۇتقارۋ قىزمەتى – ايدوس شايمەردەننىڭ جۇمىس بەرۋشىسى) قارجىلاندىرۋ مەن كەلىسىم جاساۋ جاعىنان ورتاق شەشىمگە كەلە الماي وتىر ەكەن. دەمەك، جاۋاپكەرشىلىكتى بىر-بىرىنە يتەرەدى.
ءبىز وسىنداي جايتقا كۋا بولىپ، شەتتە، وسىلاي كەلىسە الماعان تاراپتاردىڭ قۇربانى بولىپ قالىپ تۇرمىز، – دەيدى ايناش.
تابىلماي جاتقان ەكىنشى ادام – جۇرگىزۋشى ايىپ تىلەۋبەرگەنوۆتىڭ ءىنىسى امانگەلدى تىلەۋبەرگەنوۆ.
– تۋىستارىمىزدى اللا پاناسىنا الدى عوي. مايىتتەرى ءالى شىعارىلعان جوق. ارۋاعىمىزدى قۇرمەتتەيتىن قازاقپىز. ءبىز الىپ شىعىپ، ارۋلاپ جەرلەيىك دەگەنبىز. ءبىراق 23 اقپاننان بەرى قازبا جۇمىستارى توقتاپ قالدى. سول ماسەلەمەن پرەزيدەنت اكىمشىلىگىنە كەلىپ، ءوتىنىش قالدىردىق. قازبا جۇمىستارى قايتادان قالپىنا كەلتىرىلسە دەيمىز، – دەيدى ول.
امانگەلدى تىلەۋبەرگەنوۆتىڭ ايتۋىنشا، ءقازىر «مايقايىڭ» كومبيناتى “كىناسىزبىز” دەپ، جۇمىس بەرۋشى كومپانيانى «100 پايىز كىنالى وسىلار» دەپ سوتقا بەرىپ جاتقان كوىرنەدى. ىشىندە “جۇرگىزۋشى دە كىنالى” دەپ تە جازىپ قويعانىن ايتادى تۋىستارى.
– «ارتىندا كەلە جاتقان كولىك توقتادى، نەلىكتەن اۆتوبۋس ءتۇسىپ كەتتى» دەپ ارگۋمەنت كەلتىرەدى. ءبىراق ول جەردە جارىق تا بولماعان عوي. ەكى كولىكتىڭ ورتاسى – 20-30 مەتر. ارتتا كەلە جاتقان كولىك – كيا سپورتەيدج دەگەن جەڭىل كولىك. ول اۆتوبۋستىڭ قۇلاپ جاتقانىن كورىپ، بىردەن توقتاعان. اۆتوبۋسقا شۇڭقىر كورىنبەگەن. ەكىنشىدەن، جاپپاي جارىلىستاردان كەيىن بۇلار ىشىندە كىسى قالىپ قويدى ما دەپ جانتالاسىپ بارا جاتقان. بايقاۋسىزدا وزدەرى قۇلاپ كەتكەن.
ءبىزدىڭ ماقساتىمىز – ءبىزدىڭ ءوتىنىش پرەزيدەنتكە جەتسە دەيمىز. ۇكىمەت باسشىلارى قاراپ، كومبينات باسشىلارىن قانداي ادىسپەن بولسىن قازبا جۇمىستارىن قايتا قالپىنا كەلتىرگەنى كەرەك! – دەيدى ول.
امانگەلدى تىلەۋبەرگەنوۆتىڭ ايتۋىنشا، قازا بولعان ازاماتتاردىڭ تۋعان-تۋىستارىنا كومەك بەرىلگەنىمەن، تابىلماي جاتقان ايدوس شايمەردەننىڭ بالالارىنا كومەك بەرىلمەگەن. «كومەك جاعى قاراۋدا جاتىر» دەگەن جاۋاپ كەلگەن.
– كوميبينات سوزباقتاپ ءجۇر. ۇكىمەت مۇشەلەرىمەن كەزدەسدۋە سول ماسەلە دە ايتىلدى. شەتەل ينۆەستورى بايلىعىمىزدى الىپ، ادامداردى كومىپ كەتە بەرە مە؟ وسىنداي سۇراق قويدىق. ۇكىمەتتەن كەلگەندەر “قارايمىز، شەشىپ بەرۋگە تىرىسامىز” دەدى، – دەيدى ول.
